Pendent las negociacions, ambedoas parts acordèron que lo comte Raimond cediriá sèt castèls a l’armada crosada, ajudariá a perseguir los erètges dins del sieu comtat, e fariá un “acte de contricion”. Los castèls serián lo gatge perqué lo comte acompliriá la siuena promesa.

Lo pacte tanben compreniá la cession a la Glèisa dels dreches que possedissiá la familha comtala suls avescats e los establiments religioses, l’expulsion dels mercenaris contractats per defendre los limits del comtat, mas tamben l’expulsion dels josieus de las cargas publicas e lo respècte a las trèvas impausadas per la Glèisa.

Segon explican las cronicas, la ceremonia de penetença se celebrèt lo jorn 18 de Junh de 1209 a Sant Gèli, ont èra estat justament assassinat lo legat papal Pèire de Castèlnòu, motiu que desencadenèt lo començament de la Crosada.

Lo comte Raimond vestissiá coma penitent, amb lo pitrau despulhat, e amb una còrda a l’entorn del còl e un ciri a la man. Mentre lo comte demandava perdon pels sieus pecats, lo representant papal Milon, lo flagelava amb la siuena man esquèrra, del temps qu’amb la drecha lo perdonava dels sieus pecats, fins a la dintrada de la glèisa de la vila, davant del pòble e de fòrça avesques catolics de las tèrras occitanas.

Agenolhat dins del temple, escotèt lo legat Milton en legint los sieus pecats, del temps que lo comte demanava cleméncia e jurava tornar pas a pecar e realizar una longa peniténcia. Acabada la ceremònia, lo comte Raimond VIn, per evitar quin dobte que siá sus la siuena fidelitat a la fe catolica (per s’assegurar que mantendriá los sieus fèus), demanèt s’integrar dins de l’armada crosada per exterminar los “erètges” del sieu comtat.