De remembrar que, fins ara, Colomb èra considerat de Gènoa. Mas l’estudi realizat per José Antonio Lorente, de l’Universitat de Granada balha una nòva version de l’origina del conquistador iberic. Segon aquel cercaire, Colomb foguèt josieu e valencian.

La resulta de l’estudi foguèt publicada a RTVE e confirma l’origina de Colomb après estudiar e analisar las rèstas de Colomb e la sieuna familha. E es plan logica pr’amor qu’en 1492 los josieus èran expulsats d’Aragon e de Castelha e doncas Colomb podiá pas descobrir la sieuna vertadièra origina se voliá aver d’argent reial per far lo viatge a America.

Una origina polemica

L’origina de Colomb es estada polemica dempuèi fa sègles. Fins ara èra acceptat per totes que Colomb èra genoés nascut en 1451. Mas tanben i avián d’autras teorias ; Colomb foguèt catalan, balear, valencian, portugués, grèc, italian… L’estudi del libre escrich per Colomb entraïnèt de grandas discussions entre los istorians pr’amor que i aviá cèrtas frasas qu’èran pas genoesas, mailèu catalanas.

Doncas ara l’estudi dirigit per José Antonio Lorente, de l’Universitat de Granada, confirmèt una genetica estonanta. La version d’un Colomb genoés –pr’amor qu’als pòrts de Castelha a l’epòca medievala totes los marinièrs estrangièrs èran nomenats genoeses – tradicionala es pas vertadièra. Colomb foguèt pas genoés. Almens geneticament. Segon aqueste estudi genetic Colomb foguèt valencian e josieu.

L’estudi comencèt après obrir las rèstas de Colomb que i a en la Catedrala de Sevilla. Los cercaires tanben trobèron de rèstas geneticas del filh de Colomb, Fernando e lo sieu frair Diego. Lèu l’analisi genetica confirmèt que Colomb foguèt pas jamai genoés. Après foguèt descobèrta una comunautat josieva a València amb aquela genetica.

Pas totes los cercaires son d’acòrd amb aquela analisi genetica. Cèrts cercaires demanan la publiacion de las donadas geneticas. O publicar a la television espanhòla es pas pro per confirmar una descobèrta scientifica. D’autres encara afirman qu’èsser josieu pòt pas entraïnar èsser valencian. E d’autres encara dison qu’aquò confirma cèrtas paraulas catalanas als escriches de Colomb, pr’amor qu’èra valencian… se l’estudi genetic semblariá èsser definitu, cal esperar ara e veire que causirà la comunautat istorica a nivèl internacional. La genetica doncas, n’a la clau, una clau que poiriá èsser defintiva.

Fotografia principala: Colomb_1_Lalinilalon1234567890/CC