ONT ÈRAN HEELULAND E MARKLAND EN AMERICA ?
CAM.-Helluland e Markland, a mai de Vinland, foguèron territòris descriches en dos sagas medievalas norvegianas, la d’Erik lo Ròge e e la dels Groenlandeses. En mai d’aquò, foguèron los primièrs luòcs visitats per Leif Erikson abans de la sieuna arribada a Vinland (Uèi Tèrranòva, en Canadà) al sègle XIn.
Segon aquestas sagas, aquestes tres territòris canadians foguèron explorats pels vikings; Bjarni Herjólfsson i foguèt sens desbarcar, Leif Erikson tanben e Thorfinn Karsefni Thordarson atanben. Uèi qualcunes istorians afirman qu’Helluland es uèi l’illa de Baffin, en Nunavut, Canadà e Markland poiriá èsser a la còsta de Labrador.
La tèrra de las pèiras planas
En ancian norvegian Helluland vòl dire la Tèrra de las Pèiras Planas. Aquò ven aital pr’amor que los vikings, quora arrivèron, espepissèron un paisatge sens cap d’interés per èsser colonizat e sonque i avián de rainards polars. D’un autre costat, Markland, que vòl dire Tèrra de Fusta, balhèt mai d’espèr als vikings e i desbarquèron al sègle XIn.
Uèi es estat demostrat arqueologicament que los vikings visitèron Tèrranòva, mas encara demòran qualcunes mistèris per resólvre se òm vòl aver una imatge pus drecha de las sagas vikingas en America del Nòrd.
Car n’i a pas pro amb estudiar las sagas vikingas coma sola fònt arqueologica pr’amor que la saga d’Erik lo Ròge descriguèt una topografia pas gaire reala. Markland es situada al sud de Vinland e d’una archipèla nomenada Bjarneyjar (Illas dels Osses). E Hvítramannaland (Tèrra del l’Òme Blanc) o Irland serián, mai que mai, un país que jamai existiguèt.
Fa pas gaire, e amb l’ajuda dels satellits, los cercaires poguèron aver d’imatges ont i poirián aver existit mai d’una colonia vikinga. De remembrar que l’Anse aux Meadows, la sola colonia vikinga confirmada fins ara foguèt trobada amb aquela tecnica en 2015. Benlèu los cercaires poiràn ara, amb l’ajuda d’aquelas imatges confirmar se i aguèt una o mai colonias vikingas en aqueles airals e cossí foguèron aquelas colonias norvegianas medievalas. Totun, tanben cal soslinhar que las trobar serà brica aisit pr’amor que ja en 2018 divèrses mèdia alertavan sus aquel fach. E Sapiéncia tanben o faguèt. Ara, sièis ans puèi tanben alertan qu’aquò se poiriá debanar lèu, mas sens d’estudis mai prigonds de la topografia del luòc, serà plan malaisit de las trobar. E las sagas vikingas de l’epòca son pas fisables al 100%.
Fotografia principala: Ansgar Walk/CC
