JORNADA CATARA A ASCÓ
Francesc Sangar.- De poesia, de musica e divulgacion istorica en la nòva Jornada Culturala Catara organizada per las associacions Ilercavònia e Camins dels Catars a Ascó a la comarca catalana de la Ribera d’Ebre lo pròche dissabte 12 d’octòbre.
La planificacion de las activitats compren una interessanta conferéncia del cercaire Eduard Berga amb lo títol de “Referéncias istoriograficas del pas del Catars per las tèrras del Priorat e la Ribera d’Ebre”, que remembrarà la granda importància e preséncia dels Bons Òmes e las Bonas Femnas a las Tèrras Catalanas de l’Ebre.
Un debat sus los catars
Aquela conferéncia serà abans d’un debat sus l’interpretacion dels Catars coma eretges o coma bons crestians, amb l’intervencion del meteis Eduard Berga e los istorians del territòri, Pere Muñoz e Felip Puchó, e la moderacion de Biel Pubill, de l’Associacion Culturala “Lo Llaüt d’Ascó”.
La plantada d’un laurièr coma simbòl de patz, tolerància e libertat, los poèmas de Conxita Jiménez e las cançons tradicionalas occitanas cantadas per Lourdes Llauger e una cançon interpretada per Aurora Serrano finalizaràn aquela granda jornada de la recuperacion de la memòria istorica. Una jornada que contunha de defendre la candidatura dels Camins dels Catars coma Itinerari Cultural Europèu.
Fotografia principala: Angela Llop/CC.
