MURASAKI SHIKIBU, ESCRIVANA DEL PRIMIÈR ROMAN DE LA PLANETA

CAM.- Murasaki Shikibu (紫 式部) foguèt una escrivana japonesa que venguèt plan celèbra aprés la siá mòrt. Uèi es considerada coma la creadora del primièr roman modèrn de l’istòria mondiala, lo Genji Monogatari, uèi considerat extraordinàri pr’amor qu’es, a mai, un roman medieval.

Malgrat qu’es nomenada Murasaki Shikibu, lo nòm es sonque descriptiu, car vòl dire Senhora Murasaki. Los expèrts son pas segurs, mas creson que lo sieu nòm foguèt Fujiwara no Kaoriko , segon una cronica imperiala de l’an 1007.

Siá com siá, Murasaki nasquèt filha del tanben escrivan Fujiwara no Tametoki, apertenent a la noblesa mejana de Japon. L’educacion que recebèt de son paire foguèt excellenta, e leù foguèt soslinada la siá intelligéncia, plan nauta. Pasmens patiguèt força quand moriguèron la siá maire e tanben la siá sòrre.

Tanpauc aguèt astre quand maridèt Fujiwara no Nobutaka, que tanben moriguèt lèu i li daissèt una filha. Aqueste foguèt lo contèxt personal de l’escrivan quand comencèt a escriure lo Genji Monogatari, un roman plan realista.

Una escrivana celèbra

Amb lo libre l’escrivana venguèt plan famosa e lo primièr ministre Fujiwara la cridèt per viure a la còrt fins a l’an 1013 coma dauna de companhiá. Mas Murasaki moriguèt en 1014. Lo tombèl es a Tòquio e plan visitat encara uèi lo jorn.

Murasaki escriguèt, a mai del Genji Monogatari lo pròpri jornal de memòrias (Murasaki Shikibu Nikki). Lo primièr es considerat coma lo primièr roman psicologic mai ancian de tota la literatura universala. Tanben es l’òbra pus importanta de 1a literatura japonesa medievala. Es un libre singular pr’amor que Murasaki i descriguèt lo vued de la faussetat aristocratica japonesa de l’epòca. Una faussetat que provocava fòrça patiment a las femnas japonesas de l’epòca.

Lo Genji monogatari es doncas un roman que parla de la vida del Prince, pas real, Hikaru Genji e los sieus descendents. Lo libre conten 4 200 paginas. La primièra partida descriu la naissença del Prince Genji, com arriba a la còrt e com se n’aluenha puèi aprés patir lo desonor. La segonda partida descriu la vida del sieu filh e net en tot mostrar una imatge plan reala de la societat de l’epòca.

Lo contrast entre la beutat e lo patiment es grand. Descriu una societat poligamica que, malgrat bodista, fa patir plan las femnas. Dins lo libre tanben i a certs poèmas, plan importants pels personatges. Murasaki e d’autras escrivanas de l’epòca d’heian foguèron fondamentalas per la lenga escrita japonesa de l’epòca.

Ja al sègle XII èra obligat la legir a l’escòla. Sonque 100 ans aprés la siá mòrt, ja èra considerada una classica.  Foguèt plan legida e plan populara dempuèi lo sègle XVII per la populacion femenina japonesa. L’òbra, a mai, foguèt illustrada amb de pinturas al sègle XII. Uèi lo jorn encara pòt èsser trobada de biais comun la siá figura al manga. Lo libre foguèt imprés al long del sègles plusors còps, e uèi l’òbra acompanha amb de pinturas del sègle XII demòra al musèu nacional japonès coma una de las òbras d’art pus importantas de totas las epòcas de Japon.