LA PRIMIÈRA MASCA (OFICIALA) BRITANICA
CAM.- Petronilla de Meath (1300-1324) foguèt la serventa de Dauna Alicia Kyteler, un nòbla irlandesa-normanda que visquèt en Irlanda, al comtat de County Kilkenny. Après la mòrt del quatren marit de la dauna, Kyteler foguèt acusada de practicar la mascariá amb Petronilla e aquesta foguèt tanben acusada. Petronilla foguèt torturada e forçada a proclamar que ela e dauna Kyteler avián practicat de magia negra. Kyteler fugiguèt per salvar la vida, mas Petronilla foguèt brutlada lo 3 de novembre de 1324 a Kilkenny. Foguèt lo primièr cas de mascariá en Irlanda o la Gran Bretanha cremada per eretgia.
Las acusacions contra Kyteler e Petronilla, segon l’evesque d’Ossory, Ricard de Ledrede, foguèron qu’aviá negat Crist e la Glèisa. « Qu’aucián d’animals vius e los copavan a troçes coma aufrena al filh d’Art e que li demanavan d’ajuda. Que robèron las claus de la glèisa e qu’ailà i avián d’amassadas secretas nuechencas, que fasián de beuratges per ajudar las personas per s’enamorar, qu’Alicia fasiá l’amor amb un demòni e que se transformava en gat, can o òme negre e qu’aviá aucit los sieus marits amb de mascariá ».
Demònis e mascariá
Aital, Kyteler foguèt acusada de mascariá e d’anar amb demònis, qu’aviá aucit los sieus marits e qu’aviá fòrça bona santat pr’amor de la magia. Las acusacions foguèron lençadas pels filhs dels anteriors marits pr’amor que la dauna eiretèt tot çò qu’avián daissat los marits. En Irlanda i aviá pas l’acusacion de mascariá mas la glèisa confirmèt qu’èra un eretgia. La lei anglesa, en mai d’aquò, confirmava que la mascariá èra una ofensa criminala plan grèva.
Dauna Kyteler fugiguèt a Flandra e poguèt pas èsser jutjada. Malurosament, Petronilla poguèt pas fugir. L’evesque ordonèt la tortura de Petronilla e d’autras personas, tanben al servici de dauna Kyteler. Confesèron totas las acusacions. Segon una cronica de l’epòca, Petronilla confessèt qu’exomunicava sovent los marits amb de velas e qu’aquò èra pas res restacat amb tot çò que podiá far la sieuna dauna e que i aviá pas cap masca tan poderosa coma la sieuna senhora.
Petronilla confirmèt que Kyteler daissava un demòni de li far l’amor a la sieuna dauna, que parlava amb demònis e que fasiá de beuratges en tot negar Crist e la Glèisa. E qu’ela e la sieuna dauna podián volar. Petronilla foguèt alara forçada a o acceptar tot de biais public. Petronilla tornèt a èsser torturada en public e puèi brutlada viva. John Clyn, cronicaire, diguèt que « Petronilla de Midia … foguèt comdemnada per mascariá a èsser cremada viva. E jamai foguèt pas conegut cap cas de mascariá abans en Irlanda ».
Petronilla èra la maire d’un enfant nomenat Basil, que tanben poguèt fugir. Segon lo cronicaire Sir james Ware fugiguèt d’Irlanda amb dauna Kyteler. Dempuèi 2007 l’artista Judy Chicago la situèt amb una estatuta al Musèu de Brooklyn, de Nòva York en un espaci que voliá remembrar las 39 femnas dublidadas de l’istòria.
