LAS ORIGINAS DEL COMTE GUIFRÉ
Francesc Sangar.- Lo comte Guifré de Barcelona, d’Osona, de Girona, d’Urgelh, de Cerdanha e de Conflent es estat considerat coma lo “paire de la Nacion Catalana”, mas quina èra l’origina de la siuena familha? Una informacion importanta pr’amor que Guifré convertiguèt lo títol en ereditari quand moriguèt a fins del sègle IXn, en creant la dinastia comtala barcelonesa. Pendent l’Edat Medievala aquela origina familiala èra desconeguda, mas poiriá èsser relacionada amb las tèrras occitanas?
Doas proposicions foguèron difondudas aprés. Ambedoas afirmavan que lo comte Guifré èra filh del comte Sunifred I d’Urgelh e d’Ermessenda, mas èran opausadas en las identitats dels grand-paires, malgrat qu’en ambedós cases existissiá una filiacion evidenta amb raïses occitanas, e concrètament amb la vila de Carcassona.
Coïncidència de nòms ?
Una proposicion explica que lo grand-paire de Guifré èra lo comte Borrell I d’Osona, mejançant un document de l’an 829, ont lo rei franc Loís I lo Piós autrejava la proprietat de la vila occitana de Fontcobèrta al sieu vassalh “fisèl Sunifred”, una possession qu’aviá aguda anteriorament lo sieu paire Borrell. Mas vertadièrament los nòms exprimits en aquel document revenián als comtes Sunifred I d’Urgelh e Borrell I d’Osona? O èra una coïncidéncia de noms?
A l’autra proposicion lo comte Miron lo Vièlh, fraire del meteis Guifré, afirmava en un autre document notarial de l’an 879, ligat a la proprietat de la Glèisa de Sant Vincenç, que lo sieu grand-paire èra Bello de Carcassona (trobam aicí fin finala lo ligam occitan). Mas Bello èra lo paire d’Ermessenda o de Sunifred? L’inexisténcia de registres civils o de parròquia de l’epòca nos obliga a realizar d’ipotèsis, de suposicions…
Mas ambedoas teorias afirman una origina carcassonesa del linhatge comtal de Barcelona, una proposicion que pòt èsser refortilhada per la vinculacion del comte Guifré e los sieus fraires amb l’Abadiá de La Grassa, situada justament al territòri del comtat de Carcassona. Un ligam mai entre catalans e occitans.
