UN VIATGE MITIC: MARCO POLO ( 2)

Francesc Sangar.- La primièra estapa del viatge del jove Marco Polo cap a la cort de Kubilai Khan l’an 1271 foguèt lo trajècte per la mar Adriatica e la Mediterranèa Orientala fins a la vila istorica d’Acre al Prèp Orient. Acre (Sant Joan d’Acre) aviá agut un grand protagonisme coma sedença de las armadas crestianas pendent las Crosadas. Contunhava d’èsser crestiana, dins del Segond Reialme Crosat de Jerusalèm, jos l’administracion dels Cavalièrs Espitalièrs e premanida per la Sièisena Crosada dirigida pel prince Edoard d’Anglatèrra (lo futur Edoard Ir).

De Jerusalèm enlà

Los Polo contunhèron lo viatge fins a Jerusalèm amb la tòca de prene d’òli del calici de la Basilica del Sant Sepulcre, coma present per l’emperaire chinés. Mas a la Vila Santa coneguèron la notícia que Tedaldo Visconti (los Polo l’avián conegut a Acre), èra estat elegit nòu Sant Paire catolic. Los Polo tornèron a Acre e lo nòu Papa Gregòri Xn los donèt de letras credencialas nòvas per contunhar lo viatge (las emesas per l’anterior Papa defunt èran pas validas ara).

D’Acre viatgèron vèrs lo nòrd fins a Trebizonda (uèi al nòrd de Turquia), alavetz la capitala d’un empèri d’influéncias clarament bizantinas, que patissiá una situacion de guèrra perpetuala per consolidar las siuenas frontièras atacadas pels turcs otomans mas tanben pels crestians occidentals (nomenats “latins”) que luchavan contra los sarrasins amb las Crosadas, mas tanben en qualqu’unas escasenças contra l’Empèri Bizantin. La familha imperiala de Trebizonda èra descendenta de la bizantina.

Los Polo davalèron fins a Bagdad (uèi Iraq), la capitala mitica de la civilizacion islamica, mas que patissiá una granda decadéncia après la desintegracion de l’Empèri Abbasida e la destruccion provocada pels atacs mongòls l’an 1258. Totas las estructuras agricòlas e los sieus canals, qu’avián provocat pendent sègles l’enveja de las autras vilas, existissián pas pus. Los mongòls, dirigits pel khan Hulagu (1217 – 1265), felen de Genghis Khan, avián destruït divèrsas vilas musulmanas, e Hulagu recebiá lo nom simbolic de “lo terror de l’Islam”.

La seguenta estapa condusiguèt los Polo fins a la vila de Tabriz (uèi al nòrd d’Iran), tanben conquistada e ocupada pel khan Hulagu, e ont aviá establida pendent d’ans la siá sedença. Quand los Polo arribèron a Tabriz, èra ja mòrt ans abans e governava la vila Sadr al-Din.

Dempuèi Tabriz, los Polo contunhèron cap a l’illa litorala d’Ormuz (uèi tanben iraniana), un dels principals pòrts del continent asiatic, que jonhiá lo comèrci del sud de Pèrsia e l’oèst d’Índia. Malgrat las siás redusidas dimensions, a l’illa d’Ormuz residissiá una importanta comunautat de comerciants de desparièras nacionalitats.

E d’Ormuz los Polo tornèron s’endintrar a l’interior del continent fins a la vila de Balj (uèi al nòrd d’Afganistan), relativament pròcha a Samarcanda, un autre dels grands cèntres economics de l’epòca e ais de fòrça rotas comercialas. Balj aviá patit tanben las atacas mongòlas decadas abans. Marco Polo descriguèt la vila amb l’expression d’una vila nòbla e granda”. E los Polo contunhavan lo viatge…