UN DOCUMENT TROBADORESC A LA CATEDRALA DE BARCELONA
Francesc Sangar.- S’es debanada una gigantassa a l’Archiu de la Catedrala de Barcelona. La cultura trobadoresca, per la sieuna qualitat, passèt las frontièras d’Occitània, e tanben enracinèt en Catalonha e d’autres païses europèus. Una pèça de tretze fuèlhas de la primièra mitat del sègle XIV foguèt fa gaire trobada a l’archiu de la catedrala barcelonesa, amb dotze poèmas. Aquel document, compausat de dos fragments d’antologias poeticas, es fòrça interessant per diferentas rasons.
La tematica es pas l’abitual amor cortés, mas un dels dos fragments nos ofrís de poèmas del trobador Pèire Cardenal, qu’escriviá de composicions qu’atacavan obèrtament la Glèisa Catolica del moment, (aquel autor es contemporanèu de la Crosada contra los Catars) e criticava la situacion que èra patida en Occitània pendent aquel sègle XIII, per las consequéncias d’aquela Crosada a totes los domenis.
Una origina reiala
L’ipotèsi sus l’origina de l’escrivan d’aquelas antologias nos dirigís cap a qualques possibles foncionaris de la Cancelleria Reiala, l’organ administratiu de la Corona d’Aragon per la semblança de la sieuna escritura amb d’autres documents similars originaris d’aquel organisme medieval.
E tanben mòstra de nòu las relacions culturalas intensas entre las tèrras catalanas e las occitanas pendent l’Edat Medievala.
Lo document foguèt estudiat a l’Universitat de Girona pels cercaires de literatura medievala, Sadurní Martí e Míriam Cabré. Segur que seràn fòrça interessants las sieunas resultats. E esperam que de novèlas descobèrtas nos balhen mai d’informacion sus la literatura medievala catalana e occitana.
