LA MAPA DE VINLAND ES FALSA
CAM.- Un nòu analisi de la tinta utilitzada per crear la celèbra mapa medievala de Vinland demòstra que la meteissa foguèt pas creada fins a la decada de 1920. Aquò demostrariá que la mapa medievala ont i a America, seriá una mapa falsa creada al sègle XXn.
“La mapa de Vinland es falsa, çò diguèt Raymond Clemens, de la Librariá de Manuscriches e Libres Rars de Yale e autor de l’estudi. I a pas cap dobte. E amb aquò finís l’afar sus se es vertadièra o falsa”.
La còla de cercaires qu’estudièt la mapa usèt un espectroscòpi fluorescent de rais X per analizar la mapa. L’estudi a coma resulta que la majoritat de la mapa foguèt creada amb un tipe de tinta plan particulara. E lo primièr còp que foguèt creada aquela tinta foguèt en Norvègia en l’an 1923. En darrièr de la mapa tanben i aviá una escritura medievala que tanben tornèt a èsser escricha al temps modèrn. Los scientifics doncas creson que la mapa foguèt creada en tot utilizar de paginas medievalas pas escrichas d’un manuscrich del sègle XVn.
Un assag de demorèt decadas
Segon aquel estudi, “i a una volontat d’assajar de far creire que la mapa foguèt creada al meteis temps que lo manuscrich Speculum Historiale, çò apondèt Clemens. Es una mapa falsa e pas una creacion innocenta, malgrat que podèm pas conéisser qui creèt la mapa”.
La mapa de Vinland es una mapa del mond que mòstra Groenlàndia e una illa pus a l’oèst nomenada Vinilanda. Se foguèsse vertadièra, seriá la primièra espròva escricha de la coneissença del Nòu Mond a l’epòca medievala. Pasmens, d’ont venguèt la mapa e cossí arribèt a mand d’un vendeire soís pendent la Segonda Guèrra Mondiala es encara un mistèri.
La mapa foguèt comprada per un american en 1957. Puèi foguèt comprada per l’Universitat de Yale e publicada tornarmai en 1965. Totun, las darrièras decadas menèron a una polemica scientifica sus la sieuna autenticitat que demorèt decadas. Fins a uèi lo jorn.
Per Clemens, l’estudi finirà la polemica sus se la mapa de Vinland es vertadièra o pas. “D’objèctes coma la mapa de Vinland fatigan plan la comunautat scientifica internacionala actuala, çò diguèt Clemens. Volèm finir ja amb aquel debat. Poiriam estudiar d’autras causas estonantas e perdem lo temps en tot parlar de mapas falsas, çò apondèt”.
Fotografia principala: Universitat de Yale/CC.
