MAI VIOLÉNCIA VIKINGA EN NORVÈGIA QU’EN DANEMARC
CAM.- Un recent estudi demòstra que i aguèt de prigondas diferéncias entre las divèrsas comunautats vikingas que i aguèt en Escandinàvia pendent l’edat medievala. Una d‘aquelas diferéncias, segon aquel estudi, seriá lo gras de violéncia. Segon las conclusions de l’estudi, publicat a la revista internacionala Medieval World los vikings de Norvègia foguèron plan mai violents que los vikings daneses.
Pendent l’estudi, los istorians trobèron d’espròvas arqueologicas que la violéncia personala en Norvègia pendent l’edat vikinga, çò es pr’amor de combats, de feus o encara pr’amor d’assassinats, foguèt plan mai comuna en Norvègia que non a Danemarc. Las espròvas trapadas doncas confirmarián que las divèrsas comunautats que i aguèt a la societat vikinga foguèron grandas. Plan mai grandas de çò que se sospechava pr’amor que fins a uèi lo jorn èra estat totjorn afirmat que lo gras de violéncia d’aquelas comunautats foguèt parièr pertot.
L’estudi foguèt dirigit per David Jacobson, sociològ de l’Universitat meridionala de Florida. Aital, Jacobson e una còla internacionala de cercaires poguèron trobar de bèlas diferéncias segon lo luòc estudiat. Per ansin, los tombèls norvegians mostravan una violéncia plan mai nauta qu’en d’autres luòcs tanben estudiats.
Segon aquò, los cercaires confirmèron que fins a un 33% de las esqueletas analizadas en sòl norvegian mostravan de senhals de nafraduras pas mortalas e que fins a un 37% de las esqueletas norvegianas mostravan que i aguèt un trauma final letal, mai que mai pr’amor de l’ataca amb d’espadas.
Mai espadas en Norvègia
Los istorians tanben confirmèron que fins a uèi lo jorn en Norvègia èran estadas trobadas mai de 3.000 espadas de l’epòca vikinga. En Danemarc, per contra, sonque son estadas trapadas qualcunas desenas d’espadas e pro. E aquò atanben seriá una bona fònt arqueologica a l’ora de poder afirmar que los vikings de Norvègia foguèron plan mai violents que los vikings daneses.
D’un autre costat, los cercaires atanben confirmèron que la societat vikinga danesa foguèt plan mai contrarotlada que la norvegiana pr’amor d’una autoritat centrala reiala que preferissiá balhar sortida a la violéncia amb d’execucions oficialas.
Aital, las esqueletas vikingas danesas mostrèron un gras plan mendre de violéncia se parlam de combats e atacas personalas e mens encara de decapitacions, çò que suggerís que fòrça mòrts foguèron la resulta de puniments gobernamentals.
Pels istorians d’aquel estudi doncas, la clau foguèt l’estructura sociala de las comunautats vikingas en Danemarc e en Norvègia; la primièra aguèt una ierarquia sociala plan mai rigida e tanplan un poder central plan mai fòrt. Norvègia, d’un autre costat, foguèt un país plan mai descentralizat e ont los combats personals pr’amor de feus o d’episòdis de guèrra foguèron plan mai abituals.
Fotografia Principala: Sunfox/CC
