UN VIATGE MITIC: MARCO POLO (1)
Francesc Sangar.- Foguèt un dels viatges mai importants de l’istòria de l’Umanitat. Marco Polo (1254 – 1324) difondèt amb lo sieu libre las experiéncias viscudas pendent lo sieu viatge en traversant l’Asia Centrala fins a la cort de Kubilai Kan (Cinquen Grand Khan de l’Empèri Mongòl e primièr emperaire de la Dinastia Yuan de l’Empèri Chinés), ont foguèt al servici d’aquel emperaire pendent vint-e-tres ans fins al sieu retorn a Venècia.
La Venècia de l’epòca de Marco Polo, la Republica Veneciana, èra en espandiment. La vila èra venguda una capitala amb un grand desvolopament comercial, luòc basic de las rotas comercialas, que dominava tota la mar Adriatica. Mas lo mond conegut pels europèus desconeissiá totalament las frontièras que superavan lo Pròche Orient.
La familha Polo èra una dels linhatges entreprenents de la vila. Lo sieu paire Niccolò e los sieus oncles Marco e Matteo avián creada una sòrta d’empresa de caractèr comercial. E mai qu’apertenián pas a la noblesa veneciana, los Polo èran fòrça ligats als linhatges aristocratics per d’interèsses economics e per d’alianças matrimonialas. Fòrça informacions que coneissèm suls Polo apareisson al prefaci d’una edicion del libre sul viatge de Marco de l’an 1559, mas los istorians dobtan de la veracitat d’aquelas informacions escrichas dos sègles après.
La rasons del venecian
Mas, per quian rason es important aquel viatge de Marco Polo? Abans, pendent l’epòca de l’Empèri Roman avián existit “de relacions diplomaticas” entre l’alunhada China e Roma, mas avián pas aguda de continuitat per la situacion posteriora al continent europèu. Qualques missionaris crestians avián viatjat tanben a l’Empèri Chinés amb la tòca de predicar l’Evangèli.
L’importància del viatge del jove venecian proven de la difusion de las siuenas experiéncias en lo libre “Il milione” (conegut a qualques païses dirèctament coma “Los viatges de Marco Polo) escrich per Rustichello de Pisa, companh de preson de Marco l’an 1298 pendent la guèrra entre las vilas de Venècia e Gènoa. Lo libre gaudiguèt d’un grand interès e foguèt tradusit a divèrsas lengas e provoquèt la volontat de crear de rotas establas per comunicar (sustot comercialament) Euròpa e l’Alunhat Orient.
Lo libre foguèt criticat per incorporar qualqu’unas parts fantasticas sus la vida abituala e l’aparéncia fisica de qualques pòbles de l’Asia Centrala e de qualcunas províncias chinesas. Aquelas descripcions limitavan la veracitat del relat. Mas la volontat de relacion amb l’Empèri Chinés foguèt determinanta. Sèm en una Euròpa que començarà lèu l’epòca de las descobèrtas geograficas.
Los oncles de Marco avián visitada anteriorament la cort chinesa, mas sens obténer de resultats economics importants e decidiguèron tornar per consolidar qualques negòcis amb la meteissa cort imperiala. Ara, l’an 1271, lo jove Marco, amb solament dètz-e-sèt, començava lo viatge de la siuena vida. Un viatge que cambiariá la vision del mond a Euròpa, e vertadièrament l’Istòria. En lo pròche article vos explicarem las experiéncias del venecian en aquela fascinanta rota.
