DE CONFERÉNCIAS SUL CATARISME EN BARCELONA

Redaccion.- Ditz la legenda qu’en èsser executat Guilhèm de Belibasta, lo darrièr perfièch catar, la matinada del jorn 24 d’Octòbre de 1321 en Vilaroja-Termenés (e mai se en la data d’execucion i a controvèrsia), lancèt una profecia “après sèt cents ans, lo laurièr verdejarà”, en anonciant que sèt cents ans après lo movement dels Bons Òmes e las Bonas Femnas (lo laurièr) tornariá a renaisser (verdejar).

E amb motiu d’aqueles sèt cents ans, e en aumenatge a la profecia e a tot aquò que signifiquèt la comunitat dels Bons Òmes e las Bonas Femnas pendent los sègles XII, XIII e XIV, son organizadas una sèria de conferéncias en Barcelona per far conéisser divèrses aspèctes del catarisme, coma las siás cresenças, lo sieu impacte sus la societat e cultura occitanas, e la siá preséncia dins de la literatura, amb una especiala dedicacion a las darrièras comunautats que sorgiguèron al nòrd de tèrras valencianas e la figura de Guilhèm de Belibasta.

Aquelas conferéncias se celebraràn a la Librariá Alibrí de Barcelona, e seràn posteriorament telecargadas a travèrs de las rets socialas. Per aqueles que pòscan assistir, la dintrada es gratuita, mas per rasons de seguretat davant la pandémia es necessària una inscripcion prealabla per caduna de las sessions. La majoritat de las conferéncias seràn en lenga catalana.

Ongan, l’an 2021, es una granda oportunitat per recuperar la memòria d’un dels capítols que marquèron mai l’istòria de l’Euròpa medievala. E val pas dire que la revista Medievalòc farà arribar d’un biais prigond als sieus legeires cossí se desvolopèt aquel tras qu’interessant cicle de conferéncias.