CICLE “L’ESPLENDOR DE LA CULTURA OCCITANA I CATALANA”
Francesc Sangar.- Lo cicle consacrat a « L’esplendor de la cultura occitana e catalana », ont avèm participat divèrsas entitats e universitats, per mostrar una imatge ampla de la realitat medievala d’ambedós païses, al Centre Comarcal de Lhèida de Barcelona, foguèt una bèla capitada. Dempuèi l’Associacion d’Amics de la Sapiéncia Occitana (AASOC), mercejam que nos encarguèsson la presentacion de tot lo cicle pendent la primièra session, en remembrant l’afrairament entre Catalans e Occitans e lo besonh de divulgar la nòstra istòria comuna.
La primièra session foguèt presentada per l’activista culturala e granda occitanista Mariona Miret, qui dirigiguèt l’acte, en aportant tanben fòrça informacion sul tèma tractat, lo sètge de Barbastre, la poesia trobadoresca e la preséncia occitana a Lhèida e las Tèrras catalanas de Ponent. La Doctoressa de Filologia de l’Universitat de Lhèida Isabel Grifoll expliquèt l’estructura de la societat occitana dels sègles XIIn e XIIIn, coma una avançada d’una Primièra Renaissença e las caracteristicas de la poesia trobadoresca, del temps que l’estudiós del Catarisme, Jaume Cluet demostrèt als presents l’importància dels Bons Òmes e las Bonas Femnas a las Tèrras catalanes de Ponent, ont arribèron en fugissent de la repression de la Crosada contra los Catars.
La segonda session foguèt presentada per Esther Lucea, presidenta del Cercle d’Afrairament Occitanocatalan, e ofriguèt tanben un debat entre lo professor e occitanista Jaume Figueras, la Doctoressa en Filologia e Directora de l’Institut de Recèrca de las Culturas Medievalas (IRCVM) Meritxell Simó e Miquel Adroher, Mèstre de Conferéncias de l’Universitat de Perpinhan – Via Domitia, sus la cultura trobadoresca e l’evolucion de la femna en una societat coma la medievala, ont la civilizacion classica occitana representèt una clara valorizacion en lo domeni cultural e social, amb un remembre tanben per las trobairitz. La tresena session foguèt consacrada a la sciéncia e la filosofia, en mostrant una image fòrça desparièra d’aquela vision d’una Edat Mejana escura e endarrierada a nivèl de coneissença.
Presentada pel cercaire del Catarisme Eduard Berga, la jornada nos ofriguèt doas interessantas conferéncias. A la primièra lo Professor d’Istòria de la Sciéncia de l’Universitat Autonòma de Barcelona, Sergi Grau, parlèt sus la sciéncia medievala. Entre d’autras informacions remembrèt coma a Euròpa recuperèrem l’anciana sabença classica grèga a travèrs del contacte amb lo mond musulman, coma per exèmple las teorias euclidianas, o que qualques unas de las teorias de las sciéncias fisicas medievalas inspirèron aprés d’autres scientifics coma Galileu.
Fòrça interessant foguèt tanben conéisser coma la filosofia naturala d’Aristotil influencièt los estudis sus medecina pendent l’Edat Medievala. L’Universitat de Montpelhièr foguèt un dels grands centres d’estudi sus Medecina pendent aqueles sègles, amb grandas figuras coma Arnau de Vilanova. A la segonda conferéncia, l’especialista en Cabala Bartolomé Bioque nos parlèt sus las Comunitats Josievas de Catalonha e Occitània, sustot en relacion amb los estudis de Cabala. Tant las tèrras catalanas coma las occitanas gaudiguèron de grands estudis sus la filosofia cabalistica.
La quatrena session foguèt consacrada als Cavalièrs Templièrs e a Ramon Llull. Presentada per Francesc Sangar, President de l’Associacion d’Amics de la Sapiéncia Occitana (AASOC) amb un remembre cap a l’escrivana e activista culturala Montse Rubinat, la jornada nos ofriguèt doas interessantas conferéncias.
De templièrs e de filosòfs
A la primièra, Joan Ramon González de l’Associacion Culturala Castèl de Gardeny nos parlèt sus l’Òrdre dels Templièrs, dempuèi la fondacion a començaments del sègle XIIn e la siuena implicacion amb las Crosadas e l’importància en l’istòria medievala catalana e occitana, amb la creacion de las comandas templieras, coma la de Gardeny, los inicis del regne de Jacme Ir o l’expansion per la Corona d’Aragon. Foguèt concrètament analisada la figura del Grand Mèstre Templièr Arnau de Torroja. Los Cavalièrs Templièrs patiguèron una fòrta repression a començaments del sègle XIVn, amb l’intencion de dissòlvre aquel òrdre guerrièr e monastic.
A la segonda conferéncia, lo President de GRTP – Grop de Recèrcas de las Tèrras de Ponent, Miquel Torres, parlèt sus la vida e l’òbra de Ramon Llull, un dels filosòfes mai importants de l’Edat Mejana. Una personalitat tan complèxa e amb una òbra tan prigonda merita una granda consideracion, amb una produccion fòrça influenciada per la cultura occitana. Lo filosòf malhorquin demorèt a Montpelhièr e escriguèt qualques unas de las siuenas òbras en lenga occitana.
E fin finala, a la cinquena e darrièra session, l’AASOC, amb lo sieu President Francesc Sangar e lo sieu Director Christian Andreu, impartiguèt la conferéncia consacrada a las repercussions de la Crosada contra los Catars (1209 – 1255) e lo Tractat de Corbeil (1258) en las relacions entre Catalans e Occitans. Un fach istoric que marquèt l’avenir de l’Euròpa Occidentala.
Lo sòmi catalan d’Occitània desapareguèt e las consequéncias politicas, demograficas e culturalas inicièron un mur de veire que separava ambedós païses. Mas urosament, fòrça iniciativas desfàn aquela separacion, en superant estereotipes ancians. Amb aquela conferéncia e tot aquel cicle, l’AASOC a demostrat lo sieu compromís amb la divulgacion istorica, una de las pèiras angularas de la nòstra associacion.
La session foguèt presentada per José Luís Soler d’Ilercavònia e Camins dels Catars, e acabèt amb una brèva introduccion sus l’istòria dels estudis del Catarisme, de Jaume Cluet d’Amics dels Catars. La projeccion del film “Bogre. La Granda Eretgia Europèa” del cineasta piemontés Fredo Valla als Cinèmas Girona de Barcelona clausurèt aquel cicle. Esperam qu’aja continuitat e se pòsca contunhar de difondre d’erudicion e de coneissença sus Catalonha e Occitània. L’AASOC totjorn amb la sapiéncia!!!
