UN VIATGE MITIC: MARCO POLO (3)
Francesc Sangar.- Los Polo contunhavan lo sieu viatge a l’interior del continent asiatic, en seguint la Rota de la Sèda, una de las principalas rotas comercialas de l’epòca e que jonhiá de tèrras europèas e asiaticas. Dempuèi Bajl contunhèron cap a Casgar (uèi en territòri chinés), una vila que dempuèi de tempses ancians èra estada lo ponch de crosament de las rotas que traversavan Amu Daria, Kokand, Samarcanda (la mitica vila, uèi segonda mai importanta d’Ozbequistan), Almaty (l’anciana capitala del Cazacstan), Aksun e Jotan.
Al sieu libre, Marco Polo nomenava la vila amb lo nom de Cascar, e parlava d’una granda preséncia de la comunautat crestiana, malgrat que la majoritat de la populacion èra de religion musulmana, après l’envasion dels Kara-Khitai, un pòble d’ascendéncia turquica (del Turquestan).
Progressivament los Polo s’aprochavan a la capitala imperiala chinesa. La seguenta estapa foguèt Lanzhou, nomenada tanben “la vila daurada”. Una vila potenciada per la Rota de la Sèda e que possedissiá una importanta comunitat religiosa bodista.
De cap a Mongolia
Mas los Polo contunhèron pas lo camin vèrs la capitala chinesa, mas decidiguèron visitar la vila de Karakorum (uèi Mongolia). Una vila qu’aviá perduda la capitalitat de l’Empèri Mongòl fasiá pas gaire, mas que manteniá la majestuositat dels sieus monuments.
Karakorum èra una vila fòrça jove, fondada vertadièrament l’an 1220, jol reinatge del grand emperaire mongòl Genghis Khan, mas atenguèt la siá importància quand lo sieu filh, lo khan Ogedei, decidiguèt de bastir una muralha de proteccion e un palais, en venent Karakorum la capitala imperiala pendent decadas.
Aquela capitalitat seriá recuperada en periòdes posteriors per las vicissituds politicas de Mongolia, dels sieus vesins e per las luchas pel poder. Foguèt, fin finala, abandonada, e ongan los arqueològs contunhan las siuenas recèrcas de monuments e de carrièras de l’anciana vila.
Los Polo tornèron a Lanzhou e contunhèron lo camin cap a Beijing, la capitala chinesa. A començament del sègle XIIIn, los mongòls avián destruïda la vila, nomenada amb lo nom de Zhongdu (etimologicament, la capitala centrala). Rebastida e amb lo nom nòu de Beijing, un nòu linhatge, los Yuan, governava la China dempuèi aquela “Granda Capitala” (significat del nòu nom de la vila), tornarmai ressuscitada.
Marco Polo nomenèt la vila al sieu libre amb lo nom de Cambaluc. Segurament los Polo volián aténher qualques dreches comercials pel negòci familial (benlèu qualque monopòli), e tornar nòvament a Venècia, mas a Marco li esperavan d’ans de residència a l’Empèri Chinés que marcarián la siuena pròpria vida.
Pendent dètz-e-sèt ans, Marco trabalhèt coma foncionari per l’emperaire chinés Kublai Khan, en venent un dels sieus conselhièrs mai avalorats, e en coneissent de divèrsas províncias del grand empèri. Dins la siuena narracion, Marco Polo descriguèt las siás foncions imperialas, e mai que qualques istorians dobtan de la veracitat. Al pròche article parlarem d’aquela nòva aventura de Marco Polo en trabalhant per la cort imperiala.
