QUAN NEISSÈT LA SÈCTA DE LOS ASSASSINS ?
Christian Andreu.- L’origina de la sècta dels assassins encara es uèi objècte de fòrta discussion istorica. Un recent article del britanic Steve Tibble vòl ajudar a compréne melhor aquesta origina. Nosautres l’avem volgut remembrar. Los assassins demorèron pendent l’epòca dels crosats e tanben volguèron aver un ròtle revolucionàri que nasquèt d’una escission que i aguèt d’un grop ja escindit d’un autre.
En 969 los afogats del chiisme creèron lo Califat dels Fatimids en Egipte. Alara en aquel país i avián los ismailitas, desseparats dels chiitas e pr’açò luchèron contra los aràbis musulmans e contra los turcs apuèi, qu’èran sunnitas. Un dels dirigents d’aqueles chiitas egipcians foguèt persan. Aquel òme foguèt Hasan Sabbah que seriá lo fondator de l’estat nazarita en Pèrsia.
Un dirigent persan
Hasan nasquèt a Qum, en Pèrsia, aperaquí l’an 1050. La siá familha èra estada chiita mas venguèron ismailitas quand el aviá sonque 17 ans. Hasan demorèt 3 ans en Egipte en tot apréne mai sus la siá nòva religion e tornèt a Pèrsia en 1081. Hasan aviá nautas qualitats coma dirigent politic mas tanben coma dirigent militar. E pr’açò aguèt tants afogats.
Los dirigents persans d’alara èran turcs e sunnitas. Hasan venguèt un eròi nacionalista persan e una grand guerrièr. Ganhèt centenars d’afogats lèu lèu e poguèt començar una revòlta contra lo poder persan. En 1087 conquistèt lo castèl d’Alamut e decidiguèt fondar una capitala per un nòu estat. Alamut podiá suportar meses e meses de sètge pr’amor qu’èra sus una montanha a mai de 1.828 mètres sus lo nivèl de la mar. De’n primièr, Hasan envièt divèrses òmes per convertir los paisans de la region. En 1090 dintrèt el meteis al castèl coma mèstre.
Mai d’afogats i dintrèron puèi e los òmes de la garnison del castèl tanben cambièron la siá religion. Quand arribèt lo moment conquistèron sens de sang lo castèl. « Reforcèt los murs del castèl e melhorèt l’arribada d’aigua al castèl mas tanben als paisans. Ara caliá conquistar mai nauts castèls, mai d’afogats e missionàris. Lèu conquistèron los castèls de Rudbar e de Daylam, de regions pròchas. E los assassins poguèron fondar un estat esmailita en Pèrsia, desseparat dels imailitas egipcians, çò diguèt Tibble ».
Hasan sabiá qu’èran una minoria e que la majoritat èran intolerants vèrs la siá religion. E pr’açò caliá èsser politic al còp que caliá se defensar. Restaquèt los castèls e vilatges amb una lucha comuna contra los senhors feudals erètges. Una granda part del nòrd persan cambièt de pensada e venguèt tanben ismailita. E declarèron la siá independéncia dels turcs seljucidas.
« Hasan, pasmens, demorèt mai de 34 ans en Alamut e jamai daissèt lo castèl, çò apondèt Tibble. La famiha de Hasan foguèt enviada luenh pr’amor del dangèr d’ataca estrangèra. Jamai los tornèt a vèire. Un filh sieu beguèt vin e foguèt aucit. L’autre pr’amor que foguèt trobat implicat en un complot. Hasan cambièt jamai de pensada sus la siá execucion ».
Hasan demostrèt doncas aver una volontat de fèrre e sonque aital poguèt fondar e far subreviure la sècta dels assasins durant tants d’ans. Poguèt fondar un nòu estat e l’administrar amb un unic còdi de conducha. Ja alara los assassins venguèron una sècta plan fanatica que sonque aimava la sang. E demorèt aital fins a la siá fin.
