VSEVOLOD, PRINCE DE NOVGOROD

Christian Andreu.- L’istòria d’Euròpa orientala pendent l’edat mejana podiá aver seguit divèrses camins. Uèi totes vesèm amb normalitat lo domeni de Russia, mas al sègle X e fins lo sègle XV aqueste país aviá pas començat encara son camin nacional que finiriá coma poténcia regionala. Plusors estats avián, a l’epòca, un futur fantastic. E solament l’annexion a Russia foguèt lor fin politica.

La vida de Vsevolod Mistislavich (1103-1138) es la del primièr prince de Novgorod, un estat que finiriá per èsser la republica mai poderosa del nòrd-oèst rus, tan o mai que la quita Moscovia. Totun, foguèt un nòble amb pauc d’astre. Maugrat èsser prince de Novgorod, la sieu bendiment de la vila representèt çò que seriá lo domeni dels afars publics de Novgorod per son parlament e la classe mercadièra.

Atal, son Prince ja començariá una tradicion de percaça a Novgorod que fariá d’aquela vila un nuclèu politic tres qu’important en aquela region entre los sègles X e XV.

Prince de Novgorod, Pereslavl e Pskov

Mistislavich foguèt l’ainat de Mistivslav lo Grand e Cristina de Suècia e son pepin èra estat rei d’aqueste país. Foguèt nomentat coma Prince de Novgorod aprés lo nomentament de son paire coma Grand Prince de Kiev. Aquò li donèt lo drech de dirigir Novgorod. Coma Prince d’aquela vila dirigiguèt divèrsas expedicions militaras contra los chud mas atanben contra los fineses. La mòrt de son paire foguèt lo començament de la fin de son principat a Novgorod dempuèi l’an 1132.

Atal, son oncle, Grand Prince, l’envièt a Pereslavl, e aquò foguèt vist per la populacion coma una traïson pr’amor qu’aviá jurat morir a la vila. Quora tornèt a Novgorod los abitants de la vila refusèron que i tornesse. D’efièch, lo trincament foguèt total pr’amor que lo volián pus mai (maugrat aquò es confirmat per l’istoriografia russa que dirigiguèt una armada de Novgorod en 1133 contra Yuriev (Tartu, Estonia).

Apuèi, en 1134, mostrèt flaquesa en tot dirigir una expedicion contra Vladimir-Suzdel. Aquò li valguèt d’èsser empresonat amb sa familha pendent mai de 6 meses al palais de l’arquevesque. Fin finala, aguèt la libertat e quand volguèt tornar a Novgorod amb una armada se retirèt tornarmai a Pskov. Ailà moriguèt en 1138.

La casuda de Mistislavich, primièr prince d’aquela vila, es estada considerada apuèi segon l’istoriografia tradicionala russa coma lo començament de la Republica de Novgorod. La tradicion d’expulsar los princes de la vila demorariá mai de 2 sègles e solament Alexander Nevsky i poguèt regnar un cèrt temps. Segon aquò, los marrits prètzfachs d’un Prince aurián provocat la naissença d’una republica populara al Novgorod del sègle XI.

Us de les cookies

aqueste sit web utiliza de cookies, tan pròpris coma de tèrças personas, per amassar d’informacions estatisticas de la vòstra navigacion e per vos ofrir un servici personalizat. Se contunhatz de navigar, consideram que n'acceptatz l'usatge. Mai d’informacion..


ACEPTAR
Aviso de cookies