LO DESTIN DE ROMULUS AUGUST
FS.- L’istoriografia tradicionala occidentala considerèt totjorn que l’Edat Medievala comencèt a Euròpa l’an 476 amb la pèrda del tròn imperial roman de Romulus August, lo darrièr emperaire occidental. Davant las conflictivas luchas pel poder imperial, qualques istorians opinan que lo vertadièr darrièr emperaire foguèt Julius Nepote.
Lo general Odoacre, capitani de la tribu germanica dels eruls, reclamèt lo poder sus la Peninsula Italiana, mas envièt las insignias de poder a l’emperaire oriental de Constantinòble. Amb aquel gèst, Odoacre reconeissiá la sobeiranetat de Bizanci sus l’Empèri Occidental, e mai se jamai los emperaires bizantins exerciguèron aquel poder e a la meteissa Peninsula Italiana se configurèt lo Reialme dels Ostrogòts.
Mas coma visquèt Romulus August dempuèi d’aquel moment? Vertadièrament, son destin final es fòrça desconegut. Qualqu’unas cronicas, coma l’”Anonymus Valesianus II”, coneguda tanben coma “Excerpta Valesiani” e escricha en latin vulgar pendent lo sègle VI, explica que lo general Odoacre, quand vegèt que lo darrièr emperaire èra tan jove (gaireben un mainat de solament catorze ans) decidiguèt lo daissar viu. Odoacre assignèt una pension annadièra de sièis mila solids bizantins per tota la siá vida e poguèt partir a viure amb la siá familha a la Campània, al sud de la Peninsula, a la “Villa Luculliana” prèp de Nàpols, gaireben una fortalesa, bastida per la dinastia dels Escipions.
Autres cronicaires, coma Jordanes o Marcellinus Comes, ambedós istorians del sègle VI, parlan solament de l’exili a la Campània, mas sens cap compensacion economica. Après dispausam pas de cap informacion concrèta sus la siá vida. Avèm trobat solament un possible indici: una carta escricha per Casiodorus, lo secretari del rei ostrogòt Teodoric lo Grand, ont confirmava l’an 507 lo pagament d’una pension a un òme nomenat “Romulus”, e qualques estudioses opinan que poiriá parlar del darrièr emperaire. Moriguèt probablament entre los ans 520 e 530, sens qu’assagès jamai de recuperar lo tròn.
