VINLAND, LA COLONIA VIKINGA D’AMERICA
CAM.- Vinland es encara uèi un dels luòcs pus misterioses de l’edat medievala. Benlèu pr’amor que totjorn foguèt situada segon divèrsas cronicas vikingas al continent american e pas en territòri europèu, benlèu pr’amor que foguèt, segon aquelas pròprias cronicas, tanben conegudas coma sagas, una colonia vikinga. Benlèu pr’amor que patiguèt l’ataca dels indigènas de l’airal, tanplan coneguts coma skraelings, fin finala, pr’amor qu’un jorn los quites vikings decidiguèron d’abandonar aquelas tèrras e tornar vèrs Groenlàndia, la tèrra pus pròcha ont i aviá de vikings.
Uèi es considerada coma tota la còsta d’America del Nòrd situada en Tèrra Nòva, o lo quite Golf de Sant Laurenç e que poiriá plan arrivar fins a Nòu Brunswick. Mantunas sagas ne son restacadas e confirman que lo viking Leif Eriksson i arribèt aperaquí l’an 1000. Totun, la comunautat scientifica encara es pas d’acòrd sus qué vòl dire la paraula Vinland, pr’amor que qualqu’unes dison que vòl dire Tèrra de Vins. D’autres, per contra, pensan que mailèu vòl dire Tèrra de Prats.
La descobèrta de l’Anse aux Meadows
Cossí que siá, e mai enlà de la legenda, òm trapèt pas cap d’evidéncia arqueologica de Vinland fins a l’an 1960, quora foguèt trobat L’Anse aux Meadows, lo solet e unic luòc, fins ara descobèrt, ont viquèron de vikings en America. Lo vilatge medieval es situat en Tèrra Nòva, Canadà. Segon la saga d’Erik lo Roge, benlèu poiriá èsser lo vilatge viking d’Straumfjörd, que lo libre ne fa referéncia.
Vinland, tanben celèbra a l’epòca medievala coma Winland, a una etimologia pas segura ; segon l’antic norvegian es pas segur que Vin- siá vin car i a plusors cercaires qu’afirman que lo vocable vòl dire prat. Segon divèrsas cronicas lo nom de l’airal èra aquel pr’amor que i aviá al luòc de plantas que donavan de rasim e òm ne podiá far de vin. Pasmens, a l’ora d’ara encara pas totes los estudioses d’aquel luòc son d’acòrd sus aquel fach.
L’Anse aux Meadows foguèt descobèrt en 1960 per Helge e Anne Stine Ingstad. D’excavacions arqueologicas s’i debanèron al long de las decadas de 1960 e 1970 e poiriá èsser que lo vilatge foguèsse estat la pòrta de dintrada dels vikings a de tèrras situadas mai al sud e ont los colons del nòrd europèu i podián cultivar. Los arqueològs i trapèron nombroses espleches fachs de fusta e fèrre de l’epòca vikinga e restacats amb aquela cultura medievala, a mai de diferentas bastidas. A mai, semblariá èsser que los vikings i arribavan en tot i cercar de fusta.
Alavetz, se L’Anse aux Meadows foguèt un dels vilatges vikings en America situats mai al nòrd, ont èra lo sud de Vinland ? Mantuns cercaires, coma Eliot Morrison dison que lo sud de Nòu Brunswick, d’autres coma Pall Bergthorsson, que la quita vila de Nòva-York. D’autres encara, que l’airal visitat al sègle XVI per Jacques Cartier, al sud del flume Sant Laurenç. Sonque son d’acòrd a l’ora de confirmar que los vikings aurián trapat un tipe d’arbre, Vitis riparia, amb de granas semblantas a las del rasim e pr’açò nomenèron lo luòc Vinvidir.
D’autres luòcs d’America del Nòrd son estats prepausats coma de luòcs ont i demorèron tanben los vikings. En 1957 foguèt descobèrta una pèça d’argent vikinga en Maine. D’autres espleches foguèron descobèrts en la luenhana illa de Baffin, al nòrd del Labrador. De pèiras amb de runas vikingas foguèron trapadas en Minnesota e d’autres luòcs. Mas cap foguèt confirmat coma vertadèr segon los cercaires. Sonque Point Rosee, al sud-èst de Tèrra Nòva poiriá èsser un possible vilatge viking, mas encara cal balhar mai pròvas arqueologicas per poder o confirmar plan. Foguèt descobèrt en 2014 mas los arqueològs canadians estimèron que los espleches ailà trapats, en 2016, èran pas 100% vikings. Vinland, doncas, demòra encara un mistèri per resòlvre per l’arqueologia medievala actuala. Mas, benlèu, un jorn, aquò arribarà lèu (e aquò es çò que cal esperar).
