L’AASOC TANBEN CRITICA LA POLITICA OCCITANA DEL GOVÈRN CATALAN
Redaccion.- Una autra associacion catalana occitanista critiquèt la politica de l’occitan de la Secretaria de Politica Lingüistica del Departament de Cultura catalan. Ara es lo torn de l’AASOC, Associacion dels Amics de la Sapiéncia Occitana que publica dempuèi fa d’annadas las revistas Sapiéncia e Medievalòc. La critica, segon l’AASOC, vòl demorar al costat d’autras associacions occitanistas coma lo CAOC o encara lo Conselh Generau d’Aran, que critiquèron fa gaire la politica de l’occitan de la Generalitat de Catalonha.
Per l’AASOC las subvencions que recebon plusors entitats occitanistas de Catalonha per ajudar a promòure la lenga e cultura occitanas – cal remembrar que l’occitan es amb lo catalan e l’espanhòl, lenga oficiala a tot Catalonha- es « brica clara car las subvencions annadièras devon èsser balhadas segon qualcunes criteris mas reconeisson pas lo trabalh de cèrtas associacions catalanas que trabalhan, dempuèi fa ans, per promòure l’occitan en Catalonha « .
Per ansin, l’AASOC que trabalha en la publicacion de dos mejans de comunicacion en lenga occitana, Sapiéncia e Medievalòc, dempuèi fa mai de 7 ans, jorn après jorn, a mai de l’edicion de libres e podcasts tanben en occitan, critiquèt aquela politica de subvencions « pr’amor que sovent òm nega la meteissa sens balhar cap rason, e aquò es brica clar se òm remembra que son de subvencions publicas e que cal èsser mai clar e definir abans e après lo procés de subvencion perqué una associacion merita pas recebre la subvencion ».
« Se la rason balhada es qu’un mejan de comunicacion catalan en occitan déu promòure mai la varianta aranesa – e aquò tanben es relatiu car es devesir l’unitat de la lenga – cal remembrar que dempuèi l’AASOC fa annadas que se fa la promocion de l’aranés de manièra regulara coma cap d’autre mejan de comunicacion fa, çò diguèt Christian Andreu, director de la revista Sapiéncia e Medievalòc-. Avèm publicat mai de 250 articles en aranés pendent los darrièrs set ans e aquò es plan mai que d’autres mejans de comunicacion catalans qu’uèi publican en occitan. Sonque pr’açò Sapiéncia ja merita poder recebre una subvencion publica e o merita mai encara que d’autres ».
Pasmens, l’AASOC tanben volguèt èsser al costat d’autres associacions culturalas catalanas que vòlon promòure l’occitan, lenga oficiala, en Catalonha. « Avèm publicat gaireben 2.000 articles en occitan en totas las sieunas variantas dialectalas dempuèi la naissença de la revista, çò apondèt Christian Andreu. En mai d’aquò, avèm recebut mai de 750.000 visitas realizadas per gaireben 200.000 legeires. En Medievalòc, en mai d’aquò, avèm publicat mai de 400 articles de tematica medievala per promòure l’istòria comuna de catalans e occitans pendent l’epòca medievala. E avèm recebut gaireben 400.000 visitas realizadas per mai de 125.000 legeires de la planeta tota. Aquò es trabalhar pas per l’occitan ? ».
Una politica occitana marrida
Per ansin, e segon l’AASOC, la politica de l’occitan del govèrn catalan es brica positiva pr’amor que plusors associacions recebon pas una subvencion malgrat lo trabalh fach. « Dempuèi fa gaireben un an publicam tanben un article en occitan en la revista El Món Medieval, e sèm los unics qu’avèm aquò fach, çò afirmèt Andreu. Pas cap autre mejan de comunicacion catalan poguèt aquò far e sonque pr’açò Sapiéncia e Medievalòc ja meritan poder recebre una subvencion publica coma d’autras associacions. Pas degun poguèt abans aquò far e, totun, la responsa publica es negativa »
« Per rapòrt a Medievalòc, la revista a de legeires de tota la planeta. D’estudiants mas tanben d’academics medievalistas legisson de manièra regulara los nòstres articles, çò apondèt Andreu. E aquò balha de prestigi a la lenga occitana. Avèm pas de besonh degun per nos dire que fasèm un bon trabalh a l’ora de promòure en occitan de revistas de qualitat. Mas semblariá qu’aquò produsís un mal de cap a cèrts politicians ».
« Aital, cal luchar cada an per poder recebre una subvencion. L’avèm recebut sonque dos còps e lo darrièr la subvencion foguèt plan mai reducha. Avèm pas res dich abans pr’amor qu’òm aviá l’espèr que l’annada seguenta tot seriá melhor, mas es una politica brica transparenta e de mai en mai marrida. Déu èsser arrestada ja, e pr’açò demanam al govèrn catalan tornar a centrar aquelas decisions politicas se volèm pas provocar la fin de cèrtas associacions que trabalhan per l’occitan dempuèi fa annadas ».
En mai d’aquò, dempuèi l’AASOC tanben confirmèron que son brica d’acòrd amb lo modèl educatiu catalan actual, pr’amor que promou pas l’occitan a l’escòla, e i a pas d’ajudas a la publicacion en occitan als mejans de comunicacion catalans car « òm vòl pas li balhar a l’occitan la meteissa categoria qu’a lo catalan en Catalonha ». Mas sonque se i aguèsse un pauc de volontat politica, l’occitan auriá un espandiment gigantàs en Catalonha pr’amor que los catalans aiman plan la lenga d’òc.
Fin finala, dempuèi l’AASOC volguèron soslinhar que la politica « brica objectiva » del govèrn catalan actual a l’ora de balhar de subvencions per promòure l’occitan ja provoquèt la mòrt de cèrts mejans de comunicacion coma Info Occitània. « Sèm d’associacions que ganhan pas res per promòure l’occitan. Pas degun es salariat aicí. Sonque volèm promòure la coneissença e usatge de l’occitan en Catalonha e mai encara quand es lenga oficiala, çò apondèron dempuèi l’associacion. Mas se òm reconeis pas lo trabalh de totes los que trabalham per l’occitan, aquò provocarà la fin dels paucs mejans de comunicacion actuals en Catalonha en occitan. E òm poiriá se demanar se aquela es pas la tòca del govèrn catalan actual, car o sembla plan ».
