JORNADAS DE CATARISME A ANDÒRRA
Francesc Sangar.- Pendent los jorns 19 e 20 d’Abril se son celebradas doas interessantas jornadas consacradas al Catarisme al Principat d’Andòrra, amb la tòca de conéisser aquel movement crestian medieval. Amb la collaboracion del COMÚ D’ANDÒRRA LA VIÈLHA, d’AMICS DELS CATARS, dels CAMINS DELS CATARS e dels AMICS DE LA SAPIÉNCIA OCCITANA, la sedença dels actes foguèt lo Centre Cultural LA LLACUNA de la capitala del Principat.
Lo primièr jorn, tres interessantas conferéncias mostrèron als assistents l’importància d’aquel capítol istoric; l’activista cultural JAUME CLUET expliquèt la preséncia dels Bons Òmes e las Bonas Femnas al Principat amb la conferéncia “Lo Catarisme a Andòrra e al Pirenèu”.
De contunh, l’estudiós del movement, FRANCESC SANGAR, en substituissent l’escrivan e tanben estudiós del Catarisme JORDI BIBIÀ desvolopèt la conferéncia amb lo títol “Los nòstres catars: entre l’ièr e l’uèi”, sus las repercussions del Catarisme dins de la nòstra istòria e las siás repercussions al nòstre present.
E fin finala, JOSÉ LUÍS SOLER, promotor del projècte d’Itinerari Cultural Europèu CAMINS DELS CATARS prononcièt la conferéncia “Camins dels CAtars: De Montsegur a Morella per Andòrra”, ont expliquèt cossí lo Principat venguèt territòri de fugida dempuèi Occitània fins al territòri valencian per las persecucions contra los Catars.
L’endeman, foguèt exibida la pellicula “BOGRE. LA GRANDA ERETGIA EUROPÈA” del director piemontés FREDO VALLA, ont mejançant entrevistas a importants estudioses sul Catarisme, los assistents recebèron una vision fòrça completa del movement a travèrs de qualqu’uns dels païses ont aguèron una màger difusion e preséncia. E totas las entrevistas en la lenga originala, en configurant un film que mòstra tanben la rica diversitat lingüistica europèa. Progressivament, lo grand objectiu de difondre l’istòria dels Bons Òmes e las Bonas Femnas contunha. Aquel còp, a Andòrra.
