“TIRANT LO BLANC” A L’UNIVERSITAT DE BARCELONA
Francesc Sangar.- Pendent la setmana de Sant Jordi, l’Universitat de Barcelona, mejançant l’Institut de Recèrca en Culturas Medievalas (IRCVM), a organizadas doas sessions consacradas al grand roman “TIRANT LO BLANC” de l’escrivan valencian Joanot Martorell. Diluns 17 d’Abril, la conferéncia “Legir e escotar Tirant al sègle XXIn” foguèt moderada per Meritxell Simó, professora titulara de Filologia Romanica de l’Universitat de Barcelona e directora de l’IRCVM.
Josep Pujol Gómez, professor de Literatura Catalana Medievala e catedratic de Filologia Catalana a la Universitat Autonoma de Barcelona, expliquèt que, après lo grand succès de la publicacion del roman l’an 1490 a Valéncia e 1497 a Barcelona, e las traduccions a divèrsas lengas coma lo castelhan e l’italian, se produsiguèt pas una nòva edicion en la siá lenga originala, fins a fòrça sègles après. La nomenada “Decadéncia” de la literatura catalana dels sègles XVIn-XVIIIn provoquèt que gaudiguèsson de mai repercussion las traduccions.
Tornarmai al sègle XXn
Lo sègle XXn foguèt lo periòde de màger estudi e difusion del roman als territòris de lenga catalana. La siá publicacion a la Colleccion “Los nòstres classics” de l’Editorial Barcino pendent los ans 1924-1929 e la granda edicion de Martí de Riquer l’an 1947 ajudèron a l’estudi de “Tirant lo Blanc”, amb d‘aportacions coma las de l’escrivan catalan Josep Carner.
Rafael Alemany, catedratic de Filologia Catalana de l’Universitat d’Alacant e grand estudiós de la literatura medievala, e lo musician e artista valencian Àngel Lluís Ferrando ensenhèron coma lo roman “Tirant lo Blanc” es estat font d’inspiracion per fòrça creadors de desparièrs arts, mejançant la mòstra de cinc exemples basats en la dança, la musica del film del director espanhòl Vicente Aranda, la musica corala…., inspirats en divèrses fragments de l’argument.
L’endeman, dimars 18, foguèron legits qualques capítols del roman a l’Universitat de Barcelona, en completant unas interessantas jornadas consacradas a la considerada per fòrça estudioses coma lo primièr roman modèrn de la literatura europèa.
