ODON III DE BORGONHA

CAM.- Odon II de Borgonha nasquèt en l’an 1166 e moriguèt en 1218 a Lion. Foguèt duc de Borgonha, Alix e Lorrena. Filh, del duc Ug III, venguèt presonièr del rei francés amb sonque vint ans, quand encara èra prince eretièr. Felip Agust de França, per punir la revòlta del sieu paire, conquistèt lo castèl de Châtillon-sur-Seine, ont Odon dirigissía la garnison borgonhesa.

La guèrra de França contra Borgonha comencèt en 1183 pr’amor dun conflicte tre Ug III e Ug de Vergy, un vassal revoltat. D’efièch Ug de Vergy volguèt pas rendre aumenatge a Ug III e en 1183 comencèt la guèrra tre ambedós nòbles.

Vergy atacarà pertot lo ducat de Borgonha e la guèrra serà òrra. La Glèisa, que tanben patiguèt plan pendent aquela guèrra demanèt al rei francés Felip August, de l’arrestar. En 1185 i aguèt una trèva tre ambedós nòbles, mas la guèrra èra pas finida. Puèi, Ug III bastís quatre bastidas al torn del castèl de Vergy per l’assetjar. Vergy demanarà d’ajuda al rei de França. Pasmens, l’armada francesa enviada per liberar lo castèl poirà pas capitar.

Felip August demana alara Ug III d’anar a París per li confirmar la sieuna lealtat. Es desembre de l’an 1185 e lo duc de Borgonha vòl pas i anar. En 1186 una nòva armada francesa, ara dirigida pel meteis Felip August, arriba a Vergy per destruïre lo sètge. Mas l’armada borgonesa fugís e lo duc es tornarmai demanat d’anar a París per afirmar la sieuna leialtat. Lo Duc i anarà pas e es estat condemnat a pagar 30.000 liuras coma puniment.

Ug III demana d’ajuda a Frederic Barbarossa, emperaire alemand mas aqueste vòl pas anar a la guèrra contra França. Lèu s’aliarà França amb Flandra, e ambedoas armadas marchan vèrs Borgonha en 1186. Tres setmanas après conquistan lo castèl ont i aviá Odon, que demorarà presonièr dels franceses. Après aquò Ug III demana la patz.

Odon serà liberat pr’amor que l’emperaire Barbarossa demana a Felip August d’o far. Dempuèi alara Ug III de Borgonha serà un vassal fisèl del rei de França. En 1190 se’n va a Tèrra santa amb felip August e daissarà a Odon III coma regent. En 1192 après la mòrt del paire, Odon III vendrà Duc de Borgonha.

Odon a alara 26 ans. Serà coronat duc en Dijon en 1192. Un an aprés, maridarà la princesa Matilda de Portugal, e veuda del comte de Flandra. Se’n divorciarà en 1195 aprés poder pas venir comte de Flandra. E alavètz, lo senhor de Vergy tornarà a se revoltar contra Odon de Borgonha. Après negociar, receb la lealtat de Vergy e es signada una patz finala. La filha d’aqueste, Alix, serà maridada amb Odon III.

Odon III profecharà divèrsas guèrras regionalas contre l’empèri germanic per espandir Borgonha. Lo primièr comtat que conquistarà serà Amous. Quora lo rei de França vòl demanar la nullitat del sieu maridament amb una princesa denamarquesa la glèisa vòl pas. Après se signar la nullitat finala, los legats papals crosan Borgonha e son faches presonièrs. Odon II serà excomunicat e Felip August poirà se maridar tornarmai.

Mas Innocent III, lo Papa, vòl pas que Felip August demòre en concubinat amb la sieuna e pròcha fèmna e en 1199 comença un concili a Dijon per excomunicar lo rei francés. Quora es a mand d’arribar l’excomunicacion de biais public, lo concili pòt pas contunhar pr’amor qu’Odon III o enebís. Cal far un nòu concili a Viena , tèrra imperiala germanica, per poder exomunicar lo rei de França. Aquò arribarà en l’an 1200.

Mentretant, Felip August e Ricard Còr de Leon son en guèrra. En 1197 lo comte de Flandra e Ennaut, lo comte de Bolonha, lo comte de Blois e lo comte de Tolosa abandonaràn Felip August e se n’anaràn amb lo duc aquitan. En 1198 Ricar Còr de Leon visita Dijon e i trobarà Odon III.  Quora lo rei francés o sap li demana anar a París per renovar la sieuna lealtat.

En 1202, la guèrra tre Felip August e Joan sens Tèrra, lo nòu duc aquitan e rei anglés, contunha. Lo rei de França demana al duc de Borgonha Odon III e al comte de Nevers de l’ajudar militarament en Normandia. Lo papa Innocenci III menaça lo rei francés de tornar l’excomunicar se finís pas la guèrra. Odon III e d’autres nòbles signaràn un escrich per mostrar la sieuna lealtat al rei francés.

Mas en 1214 Joan sens Tèrra s’aliarà amb l’emperaire germanic Oton de Brunswick, lo comte de Bolonha, e lo comte de Flandra contra França. Odon III de Borgonha arriba a parís amb 1200 òmes, 100 cavalièrs e 400 sergents. A Bouvines, lo duc borgonhés ocuparà l’ala drecha francesa contra d’angleses, de flamencs e d’alemands.

Après la victòria francesa, Odon III, nafrat, se n’anarà vèrs Borgonha. Quora li demanan anar a la crosada per liberar Jerusalèm respond qu’a melhors causas a far. Pasmens, la sieuna conducha serà desparièra per rapòrt a la crosada catara de 1209.

La crosada contra los catars

Après l’assassinat del legat papal Pèire de Castèlnau en 1208 lo papa Innocent III convocarà una crosada contra los catars. Odon III serà amb los crosats dempuèi lo començament quora l’armada crosada crosa lo Ròse. Qualcunes dison qu’es pas la sieuna volontat mas que cal finir amb los eretges.

En mai de 1209 Felip August vòl pas i participar pr’amor de la guèrra amb los angleses, mas l’armada crosada arriba a Avinhon e puèi a Montpelhièr. En julhèt son ja a Besièrs. Après lo chaple d’aquela vila Odon III e d’autres nòbles assajan de protegir los abitants de Narbona.

En agost son davant Carcassona e Odon III vòl pas la destruire cossí demanan lo autres crosats. Quora lo legat papal li aufritz de tèrras, lo duc de Borgonha respond : Ja ai pro de tèrras e cal pas pérdre l’onor en tot raubar de tèrras a d’autres nòbles ». E las nòvas tèrras foguèron balhadas a un nòble nomenat Simon de Monfòrt.

Odon III vòl demorar tres jorns al castèl de Cabarèt, prèp de Carcassona. Totun, i tròba de resisténcia, a se’n va vèrs Borgonha tornarmai.

Un duc que pòt pas s’arrestar

En 1207 Odon III visitarà lo Dalfinat, en 1208 la vila de Lion. En 1210 es a Embrun. E en 1213 a Valènça. En 1216 es a Melun. En 1218 pòt pas pus evitar la demanda papala d’anar a Tèrra Santa e causís d’i anar.

Quora arriba a Lion, totun, en plen camin vèrs Tèrra santa, patís una ataca de còr. I morirà amb 52 ans. Lo sieu filh Ug serà lo nòu duc de Borgonha. Amb Odon III, Borgonha venguèt prospèra e urosa e lo duc foguèt plan aimat. E venguèt pus celèbra e fòrta qu’abans. Cambièt l’istòria de Borgonha per totjorn malgrat participar en de crosadas que voliá pas i anar, e que sembla que sonque i anèt pr’amor que Felip Augut li demanèt.