LA FIN DEL SHOGUN YOSHIMOCHI
CAM.- Ashikaga Yoshimochi (足利 義持) visquèt tre los ans 1386 e 1428 e foguèt lo quatren shogun del shogunat d’ Ashikaga (1394-1423) japonés. Foguèt lo tresen filh del shogun Ashikaga Yoshimitsu.
En 1394, lo sieu paire balhèt lo títol oficial de shogun al sieu filh mai jove e Yoshimochi foguèt confirmat coma lo Sei-i Taishōgun de Japon. Pasmens, lo vielh shogun volguèt pas se retirar de la vida publica oficiala japonesa e abandonèt pas lo sieu poder. E contunhèt de contrarotlar la politica japonesa fins a la sieuna mòrt, qu’arribariá sonque en 1408.
Una mission diplomatica
Encara en 1398, arribèt una mission diplomatica coreana a Japon. Un grop de coreans, dirigits per Pak Tong-Chi, e jos las òrdres dirèctas del rei de Corèa, Joseon, arribèt a Kyoto per balhar de presents a l’emperaire japonés. Yoshimochi recebèt los coreans e la carta diplomatica qu’avián del sieu rei. Puèi, foguèron balhats los presents.
En 1408 Yoshimochi poguèt, fin finala, venir Shogun de Japon. Sonque tres annadas apuèi, Yoshimochi trinquèt relacions diplomaticas amb China. Quora l’emperaire japonés Go-Komatsu abdiquèt lo tron en 1413, lo nòu emperaire foguèt Shoko, qu’aimava brica Yoshimochi. Aquò entraïnèt de guèrra tre l’armada del shogun e l’armada de la còrt meridionala japonesa. La guèrra venguèt mai e mai complèxa e malaisida pr’amor que, d’un costat demoravan Ashikaga Mochiuji, lo Kanto Kobo de Kamakura e Uesegi Zenshu, que s’alièron lèu, e encara en 1416, de revoltats s’i amassèron per luchar contra lo shogunat.
Pasmens, Yoshimochi tanben recebèt d’ajuda de cèrts aliats, coma Mochiuji en 1417. De problèmas plan mai grèus calguèt faciar, coma l’envasion coreana de Tsushima de 1419, a mai d’una famina tras que grèva qu’entraïnèt la mòrt de milièrs de japoneses en 1420. En 1422 lo supòrt militar e social a la còrt del sud cresquèt e Yoshimochi balhèt lo sieu poder al sieu filh sonque una annada puèi.
Totun, lo sieu filh moriguèt en 1425, e calguèt la tornada de Yoshimochi aquel meteis an al shogunat. La situacion politica venguèt brica aisida e Yoshimochi faguèt çò qu’aviá fach lo sieu paire, çò es, balhar oficialament lo poder al sieu filh mai jove, Ashikaga Yoshikazu, que sonque aviá alara 18 ans, mas contunhar en tot contrarotlar lo poder. E Yoshimochi contunhèt d’aver lo poder real coma shogun fins al darrièr jorn de la sieuna vida, en 1428.
