ÇÒ QUE SABÈM UÈI DE FREYDIS ERIKSDOTTIR
La celèbra guerrièra vikinga que podèm veire en de sèries coma Vikings Valhalla es estada identificada per qualcunes coma Freydís Eiríksdóttir. Pasmens, e après veire la sèrie, òm pòt se demanar se foguèt una eroïna o una assassina. Çò de pauc que coneissèm sus aquela guerrièra es que doas sagas islandesas ne parlan malgrat que tanben poiriá èsser plan vertat que jamai existiguèsse. Alara, qué es çò que sabèm e çò que sabèm pas d’aquela brava guerrièra vikinga ?
Freydís Eiríksdóttir es descricha en ambedoas sagas de Vinland. Mas son de tèxts que parlan d’istòria e, al còp, de legendas sus la descobèrta e conquista de Groenlàndia e tanben d’Islàndia. D’ailà, aquesta guerrièra, amassa, amb un grop de vikings, se’n van a Vinland, una tèrra que poiriá plan èsser America. Freydís auriá aperaquí 30 ans en aquel viatge e seriá nascuda aperaquí l’an 930, car America foguèt descobèrta pels vikings aperaquí l’an 1000.
Una saga confirma que Freydís es prenha, mas que tanben aital lucha contra un grop d’skraelings. L’autra, descriu cossí assassina una fèmna. Lo biais d’agir de Freydís en ambedoas istòrias es doncas plan desparièr, mas i a un fach comun ; la guerrièra es tras que brava.
La saga d’Erik lo Ròi
Una d’aquelas sagas es tanben coneguda amb lo nòm de Saga d’Erik lo Ròi, paire de Freydís. La guerrièra vikinga es presentada coma una filha bastarda d’Erik lo Ròi e Leif Erikson, es sonque mièg frair sieu car la sieuna maire es coneguda e es la femna d’Erik.
De biais tradicional, los vikings sonque avián una femna. La maire de Freydís poiriá èsser una esclava, e aquò sonque demòstra que Freydís aguèt un ròtle plan mendre que lo del sieu fraire. Leif es capitani d’un baissèl viking e foguèt al servici del rei de Norvègia. Lo passat de Freydís es pas conegut.
A Vinland, los vikings trapan lèu los skraelings, los nadius del luòc, e pauc a cha pauc ambedos grops venon enemics e lèu son atacats peIs skraelings. E fugisson. Qualcunes son aucits. Freydís es prenha e pòt pas córrer plan. Es daissada endarrièr quora es trobada pels skraelings.
Davant dels skraelings, Freydís ensenha la sieuna espasa e se nafra ela meteissa per demostrar qu’a pas paur. Aquò provòca d’admiracion tre los skraelings que la daissan e se’n van. E Freydís pòt aital fugir. Lo grop tornarmai amassa se’n va a Groenlàndia e l’imatge que demòra de Freidís es qu’es una guerrièra tras que brava.
Pasmens, a la saga dels groenlandeses, Freydís es decisiva a l’ora de premanir lo viatge vèrs America e dirigís l’expedicion vikinga. Se i a un tresaur serà balhat a totes en parts parièras. Çò de meteis amb la noiridura. Malgrat aquò, Freydís a fins a cinc personas amb ela que cal tanben noirir.
Un còp a Vinland, la situacion ven pièger. I a pas gaire noiridura e los vikings luchan plan entre eles. Un matin, los òmes dirigits per Freydís atacan e aucisson d’òmes d’un autre grop de vikings. Sonque demoraràn un pichonèl grop de vikings mas après èsser acusada per una autra femna d’un autre grop Freydís l’aucís. Pendent lo viatge de tornada, totes son premanits per racontar çò que Freydís faguèt pr’amor qu’es plan negatiu al mond cultural viking.
Las sagas foguèron escrichas al sègle XIII. Son legenda o i a una part qu’es reala ? En 1960 foguèt descobèrt que los vikings avián arribat a Tèrranòva. E doncas poiriá èsser que part d’aquelas sagas foguèsse real. Mas assajar de descobrir se Freydís foguèt reala o pas o se foguèt una brava vikinga o una assassina sens de sentiments ja es tot un autre trabalh qu’es pas encara, uèi, estat contunhat.
La Redaccion
