UNA CONQUISTA RAPIDA
CAM.- Una de las polemicas actualas – e ja demòra decadas e encara de sègles – entre los cercaires de l’edat medievala es la conquista islamica de la peninsula iberica. Encara uèi aquel periòde es sinonime de discussion entre d’afogats e aimants de l’epòca.
Car i a fòrça mai problèmas per resòlvre ara que non pas abans. E fòrça estudioses encara comprenon pas cossí poguèt èsser aquela conquista tan rapida o perquè demorèron de berbèrs e d’arabis en la peninsula pendent gaireben 8 sègles.
La monarquia visigòta de l’epòca viviá un marrit moment. La classe dirigenta gòta aviá divèrses problèmas e totes plan grèus: de’n primièr i aviá la lucha entre Aquila, filh del darrièr rei Witiza e Rodrigo, causit pels nòbles gòts coma nòu rei. Los còps d’estat contunhavan cossí s’èra debanat dempuèi lo sègle VIn e tanben i aviá una prigonda lucha pel poder entre lo rei e los nòbles e evesques. En mai d’aquò, lo tresaur reial èra en l’an 711 gaireben ued.
Lo desir real dels arabis
D’un autre costat, segon l’expèrt Juan Martos Quesada, encara es pas clara la volontat de berbèrs e arabis a l’ora d’envasir la peninsula. Es vertat que lo comte Julian aufriguèt a Musa ibn Nusayr, governador d’Ifriqiya, d’envasir la pensinsula, mas aqueste aimèt plan mai d’enviar primièr divèrsas expedicions d’exploracion abans de mai de 711.
Lo rei Rodrigo (e cossí avèm vist foguèt pas lo darrièr rei visigòt peninsular) èra al nòrd en tot assajar de vèncer una revòlta vasca. Quand lo general berbèr Tariq desbarquèt en abril o mai de 711 recebèt una granda umiliacion publica en Talavera car lo governador Musa voliá pas una envasion tan prigonda e rapida. E lo meteis califa de Damasc, Walid Ir, atanben demanèt d’explicas. Volián los arabis vertadièrament envasir tota la pensinsula e foguèt tot un còp d’astre ?
L’armada que desbarquèt a la peninsula e que luchèt a la batalha de Guadalete èran 12.000 òmes (un 90% berbèrs e pas arabis). Luchèron contra los visigòts (20.000 òmes ?) e ganhèron. Avián demorat mai de 45 jorns en desbarcar en Algesiras e causiguèron esperar ailà los gòts, prèp del pichon lac de La Janda, en Tarifa. Mas avancèron pas.
Es un mistèri perqué lo rei Rodrigo foguèt pas jamai trobat aprés la batalha, perqué foguèt tota la peninsula envasida tan lèu e perqué pas gaireben cap nòble gòt decidiguèt causir la lucha. L’islamizacion, pasmens, arribariá pas encara fins lo sègle Xn.
Perqué demorèron tans sègles los berbèrs e arabis en Ispània ? Perqué foguèron enviats a l’exili pendent los sègles XVIn e XVIIn e pas pendent l’edat medievala ? Foguèt la convivéncia de josieus, crestians e musulmans reala o legenda ? Cossí poguèron 10.000 berbèrs, 2.000 arabis e 700 negres conquistar un territòri tan grand en sonque qualcunes meses ? Malgrat tot, doncas, encara demòran fòrça qüestions obèrtas se volèm comprene qué se debanèt realament e perqué los berbèrs en 711 poguèron dintrar en Euròpa e i demorèron 8 sègles o mai en ne sortir.
