LO FRAIRE TRAÏDOR
CAM.- La vida del comte Raimond VIen de Tolosa es plan coneguda, uèi lo jorn. Se debana pas encara çò de meteis amb Baldoin de Tolosa, vescomte de Bruniquel e de Lautrec e fraire del primièr. La sieuna biografia es encara uèi plan desconeguda, mas çò que sabèm, demòstra que foguèt una tragedia de familha pendent l’epòca de la Crosada dels Albigeses. Una de mai.
Aital, Baldoin de Tolosa (1165-1214) es l’exemple de cossí desparièrs pòdon èsser doas personas dins la meteissa familha e mai fraires. Baldoin foguèt un dels quatre filhs de Raimond Ven de Tolosa e Constança de França que, aprés se desseparar del comte raimondin se’n tornèt a França. Baldoin visquèt doncas en París fins a la mòrt del sieu paire e sonque visitèt Tolosa per primièr còp aquel an, en 1194. Benlèu per demanar la sieuna eréncia coma fraire pus jove.
La tròba entre ambedós fraires se desvolopèt d’un biais marrit. Raimond VIen de Tolosa voliá pas li balhar res e foguèron brica amics pendent fòrça temps. Totun, lo temps suenhèt aquela relacion e, malgrat que Raimond VIen de Tolosa dobtava suls dreches de Baldoin pr’amor de la sieuna naissença, fin finala, donèt lo vescomtat de Bruniquel coma fèu a Baldoin e encara lo nomenèt mèstre del sieu jove filh Raimond.
L’ataca crosada
En 1209 los crosats atacan Occitània pr’amor qu’o a demanat lo Papa. De milièrs de crosats franceses e europèus assajan de conquistar castèl aprés castèl, vila aprés vila. En aquela epòca Baldoin es al castèl de Montferrant, en Auvèrnhe. Raimond VIen, son fraire, li a demanat de lo defensar cossí que siá. Mas Baldoin sap qu’a pas pro d’òmes per aquò far. Per sauvar la sieuna vida, Baldoin – que coneissiá plan a Monfòrt de la cort reiala francesa – demana de negociacions. E rendís lo castèl per sauvar la vida. Quora Raimond VIen de Tolosa coneis lo prètzfach, i a una fòrta discussion demest los fraires e Baldoin decidís aprés abandonar son fraire e se n’anar amb los franceses de Simon de Monfòrt en 1211. Dempuèi alavetz participarà en divèrsas campanhas crosadas dont la batalha de Murèth en 1213 ont lo sobeiran de catalans e occitans, Pèire I, i daissarà la vida.
Val pas dire que Raimond VI de Tolosa acceptèt brica aquela participacion frairala amb los crosats. E enviarà un grop d’òmes al comtat de Carcin, ont viu Baldoin per l’arrestar per traïson. E quand arribaràn a Montalban, Raimond VIen de Tolosa ordenarà l’executar per traïson lo 17 de febrièr de 1214.
La conclusion es que foguèt un nòble que causiguèt pas plan ont luchar. Se èra familha de Raimond Vien de Tolosa caliá defensar Occitània contra los crosats. D’efièch, foguèt un dels paucs nòbles occitans que luchèt al costat del crosats. Pas gaire mai nòbles occitans decidiguèron aquò far. La revenja de son fraire Raimond VIen demòstra que la guèrra tanben se desvolopèt dins cada familha, cada vilatge, cada grop d’amics.
Simon de Monfòrt aimèt brica l’execucion de Baldoin de Tolosa e arrestèt la negociacion de patz entre lo papat e los occitans aquel meteis. Benlèu tot auriá pogut finir melhor amb Baldoin de Tolosa viu, mas la sieuna causida aviá provocat la colèra del sieu fraire Raimond VIen de Tolosa, e calguèt l’executar per nauta traïson a Occitània. Aprés aquò demorèt pas pus cap pònt de dialòg entre occitans e crosats e l’istòria contunhèt lo sieu camin amb la resulta que totes coneissèm uèi.
