L’ÒME QU’EMPRESONÈT RICARD CÒR DE LEON
Christian Andreu.- Maugrat que cèrta istoriografia encara considèra que foguèt Enric VI, emperaire del Sant Empèri Roman Germanic (1165-1197) lo colpable de l’empresonament pendent prèp de dos ans – e qu’entraïnariá un trincament definitiu de la santat – de Ricard Còr de Leon (duc d’Aquitània e rei d’Anglatèrra) cal analizar un pauc mai prigondament l’istòria europèa per comprene aqueles fachs e cercar d’autres colpables.
Afirmar que l’empresonament del duc aquitan e rei anglés foguèt la consequéncia d’una conspiracion internacionala seriá pas dire cap messorga. Confirmar que lo fraire de Ricard Còr de Leon, Joan sens Tèrra, lo rei de França, Felip August, e l’emperaire alemand Enric VI ne foguèron los membres seriá tanben parlar de fachs istorics vertadièrs. Totun, la persona qu’arrestèt personalament lo duc aquitan e lo menèt fins l’emperaire Enric VI, l’executor real d’aquel empresonament, seriá un autre que (e aquò seriá puslèu una anecdòta istorica) viuriá pas pro per veire arribar l’argent que lo duc occitan deviá pagar se voliá jamai tornar èsser liure. L’executor real d’aquela conspiracion foguèt Leopold V, Duc d’Austria.
Un fach que se passèt pendent la crosada
Leopold V, de l’Ostal Babenberg, duc d’Austria e Carintia, volguèt marchar amb son emperaire Frederic Barbarossa vèrs Tèrra Santa en l’an 1189 mas un conflicte militar amb lo rei ongrés Bela III l’arrestèt de poder o far a temps. Quan Leopold arribèt a Palestina l’emperaire Frederic ja èra mòrt (en tot crosar un fluvi e s’aufegar) e sonque poguèt dirigir l’armada alemanda qu’assetjava la vila d’Acre.
Pauc apuèi i arribar lo rei de França Felip August e lo duc aquitan e rei anglés Ricard Còr de Leon desbarquèron en Tèrra Santa per conquerir Acre. Que tombèt lèu. Lo 12 de julhèt de 1191 Leopold d’Austria demandèt coma comandant de l’armada alemanda de dreches parièrs als que de franceses, d’occitans e d’angleses podián ganhar un còp la vila foguèsse devessida tre los crestianas. Ricard Còr de Leon refusèt e ordonèt quitar la bandièra austriaca de la vila d’Acre.Lo duc d’Austria se n’anèt de la vila plen de colèra vèrs lo rei anglés.
Quand un an apuèi Ricard Còr de Leon volguèt tornar a Aquitània, trobèt totes los pòrts franceses barrats. Sonque podiá desbarcar al pòrt austriac d’Aquileia e assajar d’arribar a tèrras occitanas en un viatge terrèstre. Quora èra a Viena foguèt reconegut e arrestat per d’òmes de Leopold d’Austria.
Lo duc occitan foguèt menat a la preson de Dürnstein e foguèt pas fins març de 1193 que foguèt enviat al castèl de Trifels, ont seriá vesitat per l’emperaire alemand Enric VI. La causa oficiala de son arrèst, çò diguèt alara l’emperaire alemand, èra l’assassinat del rei de Jerusalem Conrad de Montferrat. E caliá pagar 35.000 Kg d’argent per tornar èsser liure. Val pas dire que Joan sens Tèrra e Felip August èran los primièrs interessats de veire Ricard Còr de Leon en preson (lo segond podiá aital ganhar fòrça territòris continentals angleses). Sonque l’ajuda diplomatica de sa maire, Alienòr d’Aquitània, poguèt, fin finala, l’ajudar de quitar la preson e tèrras alemandas.
Ricard Còr de leon moririá d’una sageta en 1197 mas l’òme que l’empresonèt, lo duc d’Austria, moriguèt encara abans. Lo quite an que Ricard Còr de Leon recebiá la libertat, l’annada 1194, lo caval de Leopold d’Austria tombèt e son pè demorèt estrossejat. Caliá lo copar mas dengun podiá o far. Solament apuèi tres còps de destral foguèt talhada la camba. Mas èra ja tard e moriguèt de gangrena.
Èra estat excomunicat pel papa Celestin II per causa de l’empresonament de Ricard (un crosat), e calguèt doncas far de gestions amb la glèisa de Salzburg per poder lo sepelir plan. Aital finiguèt lo duc d’Austria, lo meteis an que daissava liure lo segond duc dels aquitans Ricard Còr de Leon.
