LA REVÒLTA DE CARCASSONA DE 1303 (II)

Jacme II de Catalonha-Aragon serà lo nòu rei causit per las vilas rebellas lengadocianas.

Christian Andreu.- Dempuèi la sieuna desseparacion de Navarra pendent lo sègle XIen, lo Reiaulme d’Aragon s’es fach de mai en mai grand. La val de l’Ebre puèi Catalonha tota, València e las Illas Balearas, lo Rosselhon e dempuèi 1282 tanben la majoritat de las tèrras provençalas. Las afinitats lingüisticas e culturalas amb los occitans son grandas. Los catalans an perdut lo sieu rei en Murèth e lo desir d’amassar los dos païses de la “patria romana” es encara viu.

L’infant Ferran de Malhòrca escota çò que s’es debanat en Carcassona. E fa arribar als sieus abitants qu’el seriá bon sobiran e que finiriá amb l’Inquisicion. Mas las reaccions seràn desparièras. Élie Patris e Bernard Deliciós non seràn d’acòrd. Patris n’es arderós, Deliciós dobta. Mas la majoritat decidisson d’acceptar l’infant. Aital, Deliciós, Patris e Guilhem de Saint Martin arribaràn a se trobar amb lo rei Ferran d’Aragon. Confirman que las vilas de Carcassona, Limós e Albi pòdon ja l’acceptar coma nòu rei.

Mas òm sap qu’aquò agradarà pas Felip lo Bèl. Cal s’avançar: la garnison reala de Carcassona serà chaplada pendent la simulacion d’una procession religiosa… En la prima de 1304 los consòls d’Albí refusan de dintrar en l’aventura. Mas los de Carcassona e los de Limós vòtan per unanimitat acceptar coma nòu rei lo d’Aragon. Deliciós tornarà a Catalonha per informar de la resulta de las votacions.

Plan mai qu’una aventura

L’ofensa del pòble de Carcassona al rei de França serà jamai perdonada.

Serà ara lo pròpri rei d’Aragon qui negarà l’autoritat de son filh en preséncia dels delegats lengadocians. Jacme II es familha de Felip lo Bèl e vòl pas la guerra per doas vilas problematicas. L’intriga es finida e los abitants d’aquestas vilas contunhan en tot demorar ara sens rei.

Pendent tot aquò se debana, lo Papa Benet XVI ordena arrestar lo monge rebèl. Mas lo pòble barrarà lo camin als sergents papals e Deliciós demorarà, tornamai, liure. Ara cal marchar a París per demandar  l’ indulgéncia reala mas quand i arribarà – que ja sap sus lo complòt lengadocian – l’arrestaràn e lo meteràn en preson.

La venjança del rei de França serà òrre; en Carcassona un tribunal condemna setze dels consòls a mòrt. Entre aquestes Patris, Saint Martin, Arnautz, Claveire, du Puy… Es lo 29 d’agost de 1305. E la vila aurà de pagar 60.000 liuras coma puniment. En Limós 40 ciutadans son penjats.

Solament en Limós mai de 40 ciutadans seràn penjats per l’armada del rei de França coma puniment.

Lo nòu Papa Climent V, es occitan e menarà la Còrt papala a Avinhon. Pr’aquò aurà de mercejar lo rei francés. Mercés a el es estat causit. La politica que farà serà contradictòria. Libèra Deliciós e envia 2 cardinals a Albí per arrestar un pauc l’Inquisicion. Aquestes liberaràn 40 presonièrs e ara lo papa proïbirà los liberar.

L’inquisicion tòrna a èsser brava, en Albí arrèsta los caps del moviment popular, en Carcassona perseguís los amics de Deliciós. L’ondada de repression tornarà a èsser fòrta sus lo pòble de Carcassona e benlèu, mai granda qu’abans. Contunharà fins 1310. Quand en 1314 moriràn Felip lo Bèl e lo Papa, Carcassona serà tornamai una vila “pacificada” per los franceses.

De totes los protagonistas de la revòlta solament demorarà viu Bernard Deliciós. Mas la repression es tant salvatge que demorarà amagat. Quand volrà tornar a aparéisser en public en 1319 serà arrestat e condemnat a morir en preson, ont morirà en 1320. Lo lengadòc perdiá aital un dels sieus mai grands defensors.

L’inquisicion e los sergents del rei de França auràn lo camin liure per la repression que ja comença a èsser contunha dempuèi Montsegur. Non serà fins 60 ans après que los occitans tornaràn a se rebelar contra França. Los sieus caps seran los tochins. Mas aquò ja es una autra istòria.

Us de les cookies

aqueste sit web utiliza de cookies, tan pròpris coma de tèrças personas, per amassar d’informacions estatisticas de la vòstra navigacion e per vos ofrir un servici personalizat. Se contunhatz de navigar, consideram que n'acceptatz l'usatge. Mai d’informacion..


ACEPTAR
Aviso de cookies