Comencèt lo cicle sul catarisme
Aqueste passat Dimècres 24 de Febrièr i aguèt en Barcelona la primièra sesilha del Cicle de Conferéncias del Catarisme organizat en la Librariá Alibrí e los “Amics dels Càtars” amb la collaboracion de divèrsas entitats coma lo “Cercle d’Afrairament Occitan Catalan (CAOC)”, los “Camins dels Càtars”, lo “Centre d’Estudis Càtars” de Barcelona, l’Associacion “El Món Medieval”, ”Ilercavona Terra Nostra”, “L’Espiral” e lo “Fòrum Cultural Odissea”.
En aquela primièra sesilha, la presidenta del CAOC, Núria Comas, inaugurèt lo Cicle amb un brèu discors sus l’importància sociala e culturala del movement del Catarisme pendent l’Edat Medievala en Occitània e Catalonha, e coma nexe d’union entre ambedoas nacions, pendent lo passat mas tanben al present e durant lo futur, en remembrant la memòria istorica comuna.
La primièra conferéncia foguèt donada per Francesc Sangar, sosdirector de Medievalòc, amb lo títol de L’’impacte del movement dels Bons Òmes sus la cultura Occitana. Pendent l’exposicion i aguèron de referéncias a aquela Primièra Renaissença nascuda en Occitània als sègles XII e XIII, trincada per la Crosada contra los Bons Òmes. Foguèt tanben nomenada la preséncia en de romans e de narracions popularas, la poesia epica e la populara, la cinematografia (e mai se foguèt remembrada la pauca preséncia en aquel domeni)…
La segonda conferéncia, sus la vida del darrièr perfièch catar, Guilhèm de Belibasta, e los camins de l’exili dels catars, foguèt balhada per José Luís Soler, gerent de SERVITUR, e que participa activament al projècte per crear un itinerari cultural europèu dempuèi lo Maestrat valencian fins a Montsegur, amb lo nom de “Camins dels Càtars”, que remembrarà aquelas rotas utilizadas pels Bons òmes pendent la siá fugida de la repression a tèrras occitanas. La siá conferéncia parlèt sus la creacion d’aquelas comunitats cataras al nòrd del territòri valencian, e la vida del darrièr perfièch catar, lo sieu empresonament e la siá tragica mòrt en Vilarroja de Termenés. Dijòus 4 de mars se debanarà la segonda sesilha d’aquel cicle.
