ES DESCOBÈRT UN SENHOR DE LA GUÈRRA ANGLOSAXON
Redaccion.- Una còla de cercaires de l’universitat anglesa de Reading confirmèt la troba d’un senhor de la guèrra anglosaxon del sègle VI. La tòmba aviá çò que pensan que pòt èsser un dirigent tribal de la region e poiriá ajudar plan a comprene cossí foguèt Britània aprés l’abandonament del país per part dels romans.
La descobèrta se debanèt per primièr còp en 2018 mas foguèt pas fins a l’estiu de 2020 qu’una còla d’arqueològs e benevòls trobèt la tòmba del ja conegut coma Senhor de la Guèrra de Marlow. Dins la tomba, situada dins un puèg del comtat de Berkshire, i trapèron lo guerrièr a mai de divèrsas armas e utís personals, çò que confirmariá la sieuna importància a l’epòca. La troba foguèt publicada al numeric Medievalists.
“Ja aviá estudiat lo terren abans dos còps, çò diguèt Sue Washington, de la còla que descobriguèt la tomba d’aquel guerrièr. Totun, o aviá pas fach amb prigondor. Per aquò decidiguèri de tornar a aquel puèg un tresen còp. E foguèt alavetz quand trobèri aquel estonant guerrièr del sègle VI”.
Prèp del puèg ont foguèt trobat lo Senhor de la Guèrra de Marlow los cercaires registrèron la descobèrta a l’Ofici d’Antiquitats Anglés (PAS). Un còp aquò fach lo burèu local del PAS ordenèt d’excavacions publicas e encara i foguèron trapats dos tròces de lança de fèrre que semblarián aperténer a l’epòca medievala. Uèi, totes aqueles espleches pòdon èsser espepissats al Musèu de Buckinghamshire, en Aylesbury.
Una tomba clau
Aprés la descobèrta de la tomba del senhor de Marlow en 2018 lo Departament d’Arqueologia de l’Universitat de Reading decidiguèt ne far una excavacion arqueologica. “Çò qu’esperavèm èra i trobar una tomba de l’epòca anglosaxona, mas çò que trobèrem va mai enlà, çò diguèt Gabor Thomas, arqueològ d’aquela universitat. De segur que podèm parlar d’una descobèrta medievala arqueologica importanta pr’amor qu’ajudarà a comprene melhor qu’es çò que se passèt en aquel airal aprés la marcha dels romans”.
Lo Senhor de la Guèrra de Marlow faguèt 1,82 mètres e amb el i trapèron una amassada d’armas, plan estonantas. Aquò vòl dire que foguèt un dirigent celèbre a l’epòca. “Foguèt un òme naut e fòrt per aquela epòca, çò apondèt Thomas. Seriá tanben un òme aital uèi lo jorn. E lo tipe de tomba dins un puèg des d’ont òm pòt agachar plan lo flume Tamèsi soslinha encara mai la sieuna importància”.
Amb lo nomenat Senhor de la Guèrra de Marlow foguèt tanben trapada una espada plan ben conservada, divèrsas lanças a mai d’autres utís personals qu’uèi son a mand d’èsser estudiats d’un biais pus prigond pels arqueològs. En mai d’aquò cal far ara una analisi genetica per trobar l’edat d’aquel òme, la sieuna dièta e santat e la sieuna origina geografica.
La troba es importanta pr’amor qu’a l’epòca i arribèron divèrses grops de defòra de Britània e la region es considerada coma la frontièra demest çò que puèi serián puèi los reialmes de Wessex, Mercia e Kent. E lo puèg del Senhor de la Guèrra de Marlow es en la frontièra entre aqueles reialmes ont i demoravan poderosas tribús que fasián totjorn la guèrra entre elas.
