CONTUNHA LO CICLE DEL CATARISME
Francesc Sangar.- Aqueste passat dijòus 4 de Març s’es celebrada en Barcelona la segonda sessilha del Cicle de Conferéncias del Catarisme qu’an organizat en la Libreriá Alibrí los Amics dels Càtars amb la collaboracion de divèrses organismes coma lo Cercle d’Afrairament Occitan Catalan, Camins dels Càtars, lo Centre d’Estudis Càtars de Barcelona, l’Associacion Lo Mond Medieval, Ilercavona Terra Nostra, L’Espiral e lo Fòrum Cultural Odissea.
En aquela segonda sessilha, Sergi Grau, Doctor en Filosofia e escrivan de libres sul Catarisme coma “La invenció dels càtars”, “Cátaros e inquisición en los reinos hispánicos” o “L’herètica pravitat a la Corona d’Aragó”, expausèt jol títol “Episòdis de la Crosada albigesa” qualqu’unes dels eveniments pus importants de la Crosada contra los Bons Òmes, que se desvolopèt en desparièras estapas dempuèi l’an 1209 fins a 1256. Parlèt, fin finala, suls nomenats “castèls catars”, que vertadièrament èran pas catars, e cossí agarrar l’esperit de la vida abituala dels Bons Òmes en qualqu’unes d’eles, coma Niòrt de Saut o Usson (So).
La segonda conferéncia, amb lo títol “L’espiritualitat en lo Catarisme”, foguèt impartida per Eduard Berga, escrivan e director del Centre d’Estudis Catars de Barcelona. La siá conferéncia tractèt sus cresenças e dògmas dels Bons Òmes, un aspècte qu’es estat abitualament eclipsat per d’autres aspèctes coma persecucions o l’aparicion de las primièras comunitats. Tota una reflexion de filosofia e religiositat fòrça interessant, que remembrava l’interpretacion que los Bons Òmes realizèron suls Evangèlis e los ensenhaments crestians. Lo pròche dijòus jorn 11 se celebrarà la tresena sessilha d’aquel cicle.
