LO FILME”BOGRE” TÒRNA A CATALONHA
Francesc Sangar.- Pendent la darrièra setmana del mes d’Abril de 2022, lo film “BOGRE. LA GRANDA ERETGIA EUROPÈA” del director FREDO VALLA tornarà a èsser projectat a Catalonha. Una granda produccion consacrada a la dissidéncia religiosa mai importanta de l’Edat Mejana europèa, lo Catarisme.
Mejançant “BOGRE” podèm gaudir d’un viatge per qualqu’unes dels païses ont lo movement dels Bons Òmes enrasiguèt amb mai importància e ont daissèt una emprenta mai prigonda en l’istòria e la cultura. Bulgaria, Bòsnia e Erzegovina, Itàlia, e naturalament Occitània.
Un mond de dissidéncia religiosa
mb imatges dels paratges per ont transitèron los Bons Òmes e las Bonas Femnas fa de sègles, que nos condusisson a una recèrca istorica e espirituala, en establint un ligam entre lo Bogomilisme e lo Catarisme, Fredo Valla, nos ofrís de divèrsas entrevistas amb grands intellectuals e d’istorians qu’an estudiat lo Catarisme, las siás influéncias e las siás repercussions. La persecucion contra los Catars foguèt un dels capítols mai tragics de l’istòria medievala europèa, que configurèt unas frontièras entre los estats e acabèt amb las dissidéncias religiosas al nòstre continent pendent sègles, en establint un monopòli religiós e esperital que seriá solament discutit tornarmai amb succès ras de las reformas protestantas del sègle XVI.
Lo film respècta las lengas originalas de las personalitats entrevistadas, e aital “BOGRE” incorpòra de fragments en francés, occitan, bulgar, italian e sèrbocroat en la modalitat bosniaca. Tot un plaser pels amants de las lengas e la filologia. La produccion serà exibida amb sostítols en lenga catalana.
E aital deviá èsser, un film plurilingüe, perque lo sieu director FREDO VALLA, es nascut al Piemont, a las Valadas Occitanas, e la siá lenga familiala es l’occitana. Pendent la siá prolifica produccion culturala totjorn lo director es estat un grand activista defensor de la diversitat lingüistica europèa, e sustot de la difusion de la lenga e la cultura occitanas.
Lo film serà exibit en doas parts a l’UNIVERSITAT DE BARCELONA los jorns 26 e 29, amb doas Taulas de Debat amb especialistas que tractaràn suls tèmas expausats al film, tant dempuèi una vision istorica, coma lingüistica e culturala. Tanben lo film serà exibit lo jorn 27 a l’UNIVERSITAT AUTONÒMA DE BARCELONA e lo jorn 28 dins l’AUDITÒRI de la Carrièra Calàbria de Barcelona. Amb “BOGRE. LA GRANDA ERETGIA EUROPÈA” recuperam un fragment de l’istòria europèa, qu’aviá patit un oblit pendent sègles.
