JORNADA CATARA A SANTA MARIA DE GUALTER
Francesc Sangar.- Lo jorn 24 de Junh, dempuèi dètz oras del matin, al Monastèri de Santa Maria de Gualter, a la comarca catalana de la Noguera, se celebrarà una interessanta jornada amb divèrses especialistas e estudioses dels movements dels Bons Òmes e las Bonas Femnas, amb divèrsas activitats per remembrar la memòria istorica del Catarisme dins aquelas comarcas catalanas occidentalas, amb un important caractèr medieval e occitan.
En aprofechant la jornada, José Luís Soler de SERVITUR presentarà lo projècte d’Itinerari Cultural Europèu dels CAMINS DELS CATARS. E Eduard Berga del CENTRE D’ESTUDIS CATARS de Barcelona aufrirà la conferéncia “Las emprentas istoriograficas dels Catars a las tèrras de Lhèida segon de registres inquisitorials”.
Serà aprés projectat un tròç del film “BOGRE. LA GRANDA ERETGIA EUROPÈA” del director piemontés Fredo Valla, coma entratge al debat amb José Luís Soler, Eduard Berga, Jaume Cluet d’AMICS DELS CATARS e Francesc Sangar de l’ASSOCIACION D’AMICS DE LA SAPIÉNCIA OCCITANA jol títol “Los Catars, la granda eretgia medievala de Catalonha”.
La Baroniá de Rialb
Lo monastèri de Santa Maria de Gualter es als territòris que formavan ancianament la Baroniá de Rialb, ont se manten encara amb orgulh lo sieu passat medieval. Una interessanta visita amb l’escrivan e estudiós del Catarisme Jordi Bibià nos endintrarà en aquela istòria a travèrs dels sieus monuments, testimònis d‘emprentas dels Catars per la Baroniá.
La jornada se completarà amb un aumenatge als Bons Òmes e las Bonas Femnas amb la plantada d’un laurièr, un recital de poesia e musica a la glèisa del monastèri amb los escrivans Montse Rubinat, Conxita Jiménez e Jaume Invernon, e l’interpretacion per totes los assistents de divèrsas cançons tradicionalas occitanas.
Se poirà tanben assistir a un dinar amb cosina tipica de l’epòca dels Catars e una reünion al restaurant, amb resèrva prealabla. Totas las activitats, a l’excepcion del dinar son gratuïtas.
