DIMENJADA CATARA A LA CERDANHA

Francesc Sangar.- Una dimenjada interessanta, pendent los jorns 8 e 9 de Julhet a la comarca catalana de la Cerdanha per remembrar lo passat medieval e la memòria istorica dels Catars, amb una quantitat importanta d’activitats.

Pendent lo matin de dissabte 8, al pòble d’Olopte, poiretz trobar una fièra de demostracion de mestièrs tradicionals e artesanals, acompanhada de danças e musicas tradicionalas pirenencas e ont destacam la representacion poetica sus divèrses eveniments istorics ligats amb los Bons Òmes que la poetessa Conxita Jiménez e José Luís Soler ofriràn al public assistent. Serà aprés plantat un laurièr coma simbòl de la libertat e la memòria dels Catars. Lo Grop Teatral de la Cerdanha interpretarà d‘scènas de la vida vidanta dels Bons Òmes e las Bonas Femnas.

Pendent la serada, al pòble d’All,  José Luis Soler presentarà lo sieu projècte d’Itinerari Cultural Europèu « Camins dels Catars », l’investigador Eduard Berga ofrirà una conferéncia amb lo títol « Lo Catarisme al comtat de la Cerdanha » e dobrirem un debat amb eles e Jaume Cluet e Francesc Sangar, de l’AASOC.

Pendent la nuèch, a la glèisa romanica d’All, lo public assistent poirà gaudir del concèrt intitulat « Cants de Trobadors e Pelegrins. Los camins dels Catars, la musica e l’espiritualitat en l’epòca medievala », cantat per la soprano Olga Miracle e acompanhada de Joan Codina e Daniel Buxeda, amb l’interpretacion de cançons medievalas, e tanben de tradicionalas catalanas e occitanas.

L’endeman, una passejada pels camins que devián segurament recórrer d’All a Olopte los Bons Òmes e las Bonas Femnas fa uèch sègles, amb d‘explicacions istoricas fòrça interessantas e la lectura de poesias ligadas al tèma. Doas grandas jornadas de cultura medievala!!!