JORNADA CATARA A PERAMEA
Francesc Sangar.- Contunha la programacion consacrada a recuperar la memòria istorica dels Bons Òmes a Catalonha pendent l‘estiu de 2023. En aquesta escasença, lo passat jorn 22 de julhet al sud del parçan catalan del Palhars, a la vila de Peramea. E ont las campanas an dirigit lo desvolopament de la jornada.
Las activitats comencèron amb lo son d’aquelas meteissas campanas de la glèisa de Peramea. Lèu leù los assistents podèron gausir d’una antologia poetica jol títol de “La telada de l’ombra”, recitada per la poetessa Conxita Jiménez e las explicacions de José Luís Soler de l’associacion Camins dels Catars pels environs de Peramea, que condusiguèt los assistents en una visita istorica e culturala als luòcs mai importants, ont podèm encara veire las peadas dels Bons Òmes e las Bonas Femnas de fa uèch cents ans enrè.
Lo simbòl de la libertat
A l’emplaçament conegut coma lo “Portalet” de Peramea, al miègjorn, e après tornarmai del son de las campanas, foguèt plantat un laurièr, simbòl de la libertat e del remembre dels Catars, e coma remembra de la profecia del darrièr Perfièch Catar, Guilhèm de Belibasta, executat l’an 1321 al lenhièr. Una profecia remembrada, “Als sèt cents ans lo laurièr reverdejarà”.
Foguèt aprés exibit un tròç del film “Bogre. La granda eretgia europèa”, del director piemontés Fredo Valla, que mòstra la preséncia del Catarisme en qualqu’unes dels païses europèus ont gausiguèt d’un màger espandiment. Lo tròç exibit èra lo correspondent a la preséncia a las tèrras occitanas.
Los assistents podèron gausir d’un dinnar acompanhat d’un interessant debat sus aquel capítol istoric e la bona cosina tradicionala d’origina medievala del parçan catalan del Palhars.
Pendent la serada divèrsas interessantas conferéncias, començadas tornarmai après lo son de las campanas de la glèisa de Peramea, mostrèron una vision fòrça completa sus la preséncia del Catarisme al territòri. La primièra, de José Luís Soler, expliquèt l’ambiciós projècte de Camins dels Catars per crear un Itinerari Cultural Europèu dempuèi las tèrras valencianas del Maestrat fins a la mitica montanha de Montsegur.
Aprés, lo cercaire e director del Centre d’Estudis Catars de Barcelona, Eduard Berga, aufriguèt la conferéncia “Las peadas del Catarisme al comtat del Palhars”, sus la preséncia medievala dels Bons Òmes dins aquel ancian comtat catalan. E comencèt aprés un debat amb lo public assistent.
Fin finala, a la plaça principala de Peramea, foguèt aufrit un concèrt musical amb lo grop Monnie & The Awesome Boys, que presentèron la cançon “The Cathar Man”, un viatge musical a travèrs dels contrastes de desparièras culturas. Una fin excepcionala per una jornada excepcionala al Palhars catalan.
