DE CANTS DE TROBADORS E PELEGRINS A BARCELONA
Francesc Sangar.- Grand succès del concèrt “Cants de Trobadors e Pelegrins. Alegransa, Musica medievala” a l’Espaci Bes de Barcelona lo passat dissabte 20 de Genièr, amb Olga Miracle, coma soprano, Daniel Buxeda amb l'”organetto” e Alejandro Tonatiuh amb la fidula.
Un repertòri divèrs amb cançons en latin, catalan e occitan dels sègles XII al XIV, un periòde d’esplendor e expansion a Occitània e Catalonha. Cossí comenta Olga Miracle, los trobadors e las trobairitz, exprimiguèron pel primièr còp lors sentiments amb una granda qualitat, e de sègles après, encara podèm gaudir d’aquela sensibilitat impressionanta.
La trobairitz Beatritz de Diá
Dins de la lista de cançons destacam l’extraordinària interpretacion de l’òbra de la trobairitz occitana Beatritz de Diá e las cançons del “Libre Roge de Montserrat” de Catalonha e de las “Cantigas” de la cort del rei Anfós X de Castelha.
E una granda capitada, ligar de trobadors e de pelegrins, doas figuras principalas de l’Edat Mejana europèa. Los primièrs, abitualament d’origina nòbla e los segons, d’origina umila que caminavan per las rotas vèrs als monastèris o las glèisas, en cantant de cançons religiosas que los animavan a contunhar. La musica, una manièra fòrça adeqüada de conéisser a l’epòca medievala.
