DE MUSICA E DE POESIA MEDIEVALA A L’UNIVERSITAT DE BARCELONA
D’interessantas jornadas a l’Universitat de Barcelona pendent aqueste abril jos lo títol “Musica e poesia a la Corona d’Aragon (sègles XIII – XV)”, sustot amb la presentacion del projècte MiMuS. Amb una excellenta organizacion realizada per l’Institut de Recèrca en Culturas Medievalas (IRCVM) e la Facultat de Filologia, entre d’autres organismes.
Entre las divèrsas conferéncias, cal soslinhar aquelas plan ligadas a la tematica occitanista. La Doctoressa de l’Universitat de Girona, Míriam Cabré, expausèt dins la conferéncia “Trobadors e Joglars a la Corona d’Aragon (sègles XIIn e XIIIn)” las dificultats per conéisser la vida concrèta de fòrça trobadors e joglars e l’estrecha linha que desseparava ambedós mestièrs. Aquela situacion provòca qu’ongan encara ajam de problèmas per definir exactament un trobador e un joglar e lors diferéncias. La luenhença en lo temps e l’abséncia de concrecion de qualqunas “vidas” de trobadors nos prejudícian en preténer classificar los artistas de l’epòca.
L’art de trobar
Aprés, Anna Alberni d’ICREA (Institucion Catalana de Recèrca e Estudis Avançats), amb la conferéncia “Segon art de trobar es pas serventés ni son de coblas” demostrèt l’importància de la lirica trobadoresca a la cort del rei Pèire lo Cerimoniós a mitat del sègle XIVn, mejançant la correspondéncia qu’avián qualques membres de la meteissa cort, dont l’enfant Joan, e l’utilizacion d’aquelas creacions poeticas amb una intencionalitat personala e politica.
Anna Fernàndez-Clot e Simone Bari de la Fondacion Bosch e Gimpera mostrèron lo projècte MimUs, un enòrme còrpus qu’ajuda l’estudi de documents sus los artistas que participèron a la vida musicala de la cort aragonesa e barcelonesa, mas tanben de las corts senhorialas dins los estats de la Corona d’Aragon dempuèi lo sègle XIIIn fins a la mitat del XIVn, e mai que la tòca es arribar fins al XVn. Una consulta estrategica pels interessats en conéisser la cultura d’aquela epòca medievala.
Paolo Squillacioti de l’”Opera del Vocabolario Italiano” mostrèt lo Còrpus del Projècte TOC, la “Trattatistica occitanocatalana” a l’entorn del tèxt de las “Leys d’Amor”, lo principal tractat sus las nòrmas lingüisticas e literàrias que devián emplegar los trobadors quand compausavan lors creacions literàrias.
Foguèron de jornadas interessantas que gaudisson de continuitat amb los projèctes presentats per conéisser melhor lo mond musical de la Bassa Edat Mejana a la Corona d’Aragon.
