OTTO RAHN: SERVENT DEL GRASAL O DE L’ESVASTICA? (I)

Francesc Sangar.- Lo cercaire Otto Rahn es una de las personalitats mai controvertidas ligadas als estudis contemporanèus sul movement dels Bons Òmes, per la siuena collaboracion amb lo Tresen Reich alemand.Nascut a la vila de Michelstad a la província d’Hessen l’an 1904, visquèt en un ambient tipicament conservador e religiós. La siuena familha voliá qu’estudièsse Drech, e vertadièrament estudièt en divèrsas universitats alemandas, ont coneguèt un professor de religion de l’Universitat de Giessen. Amb el parlèt pel primièr còp dels Bons Òmes.

Estudiós de Wolfram von Eschenbach

La siuena tèsi doctorala foguèt consacrada a l’òbra del poèta medieval Wolfram von Eschenbach, qu’escriguèt “Perceval”, una de las òbras mai importantas del cicle del Grasal. Interessat, coma fòrça autres estudioses pel mite del Grasal, assajèt de deschifrar a quina montanha o quin endrech fasián referéncia d’escrivans medievals coma lo meteis Wolfram Von Eschenbach o Chrétien de Troyes amb los nòms Montsalvatsche o Montsalvat.

Otto Rahn supausèt al començament qu’ambedós noms fasián referéncia a la montanha mitica dels Bons Òmes, Montsegur, ont se refugièron de cresents en un long sètge entre los ans 1243 e 1244 e que finalizèt amb la mòrt de dos cents “erètges”.

Après, a Paris, visitava sovent de cercles esoterics en assajar de trobar de responsas sus qualqu’unes mistèris dels Bons Òmes, viatgèt a Occitània, ont coneguèt Antonin Gadal, un grand cercaire del Catarisme que pensava que lo Grasal e los Bons Òmes èran ligats. Visquèt pendent tres meses a L’Avelanet l’an 1929 e realizèt d’escavaments a Montsegur, las caunas e lo paratge, ont reculhiguèt d’informacion pels sieus dos principals libres.

Mas l’istòria marcariá la trajectòria d’Otto Rahn. Adolf Hitler venguèt cancelièr d’Alemanha e comencèt d’aplicar las siuenas politicas. Totes los alemands a França èran suspèctes de desvolopar d’activitats d’espionatge, e Otto Rahn tornèt a Alemanha, ont publiquèt “La Crosada contra lo Grasal” (“Kreuzzug gegen den Grial”) l’an 1933. Amb un grand succès d’aquela publicacion, Heinrich Himmler, lo segond dirigent amb mai poder del Tresen Reich, s’interessèt per las siuenas recercas. E Otto Rahn dintrèt a las SS nazis coma sos-oficial  (“Unteroffizier”), segon sembla mai per besonh e obligacion, que per partejar las idèas del nazisme…