LOS CAVÒTS DE LOS COMTES D’URGÈL
Francesc Sangar.- Lo linhatge de los comtes d’Urgèl es un de los mai importants de la Catalonha medievala. Los fèus que foguèron jos lo sieu domeni ocupavan un grand territòri. Son estats recentament dobèrts los cavòts de quatre membres d’aquel linhatge qu’èran a la glèisa del Monastèri de las “Avellanes”, a la comarca catalana de la Noguera, per poder verificar l’autenticitat dels sieus còrsses.
Concrètament son estadas analisadas las despolhas del comte Ermengol X (1254 – 1314), los sieus parents Alvar I (1243 – 1268) e Cecília de Fois (tornam a trobar de vinculacions amb Occitània) e lo sieu fraire Alvar II (1275 – 1299), vescomte d’Àger. Los còrsses son estats trobats dins un estat de bona conservacion, malgrat los sègles qu’an transcorregut.
Las tòcas scientificas
La tòca d’aquelas analisis es tanben descobrir las vertadièras causas dels decèsses d’aqueles nobles e qualques caracteristicas fisiologicas. Del comte Ermengol X s’a descobèrt que la causa de la siuena mòrt poiriá èsser estat qualque malautiá pulmonara e respiratòria (benlèu tuberculòsi?).
Del vescomte Alvar II son estadas trobadas d’incisions que remembran qu’als nòbles mòrts luènh dels sieus fèus (aquel vescomte a Sicília), amb la tòca de poder retornar los sieus orsses als sieus luòcs d’origina, los èran practicadas aquelas incisions coma una sòrta de ritual. Los esquelèts dels òmes mesuravan 1,80 mètres, una nautor fòrça elevada en aquela epòca, mas que demostrariá qu’èran de personas que gaudissián d’una bona alimentacion. Solament los nòbles e los eclesiastics podián manjar de manièra abituala e sufisenta.
Lo Monastèri de las “Avellanes” èra estat lo Panteon del linhatge dels Urgèl dempuèi lo govèrn d’Ermengol VII l’an 1177. Lo meteis Ermengol X aviá realizats d’agrandiments del monastèri, e las donacions del linhatge èran estadas abitualas. Los sepulcres actuals son pas los originals. Los primièrs foguèron venduts al musèu The Cloisters de Nòva York, ont trobam fòrça pèças arquitectonicas e esculturalas dels monastèris medievals europèus.
