LAS COBÈRTAS DE MIRAPEIS
Francesc Sangar.- La vila de Mirapeis, al departament de l’Arièja, conserva qualques estructuras medievalas fòrça interessantas pels visitants atraches per l’arquitectura d’aquela epòca. A la plaça principala de la vila, nomenada uèi Plaça Leclerq e sedença del mercat setmanièr de diluns, podèm trobar la siuena catedrala de Sant Maurici. La primièra glèisa, a l’autre costat del riu, foguèt destruida per l’inondacion de l’an 1289. Lo bastiment de l’actuala edificacion comencèt l’an 1297, jol patrocini de Joan I de Levi-Mirapeis e la siuena femna Constança de Fois e acabèt sièis sègles après!!! Coma caracteristica excepcionala, la siuena nau centrala es unica (a pas doas o tres) e mesura vint-e-dos mètres.
La plaça es encerclada per una sòrta de bastissas apiejadas per de cobèrtas, amb de colomnas bastidas amb fusta qu’ofrisson una vision tradicionala que remembra las estructuras de las vilas de l’epòca medievala. Uèi la plaça es abitada de botigas, de cafeterias e de restaurants e configura lo principal endrech d’òci de la vila.
Mai enlà del sègle XIII
Aquelas cobèrtas foguèron bastidas dempuèi la fin del sègle XIII, mas la majoritat son del sègle XV. Dins del perimètre, amb una longor de cent quaranta mètres, trobam lo nomenat Ostal dels Cònsols, del meteis sègle XV, ont las fustas orizontalas de las cobèrtas ofrisson cent quatre esculturas dels caps de personas umanas, d’animals, de monstres fantastics e de scènas de la vida quotidiana. Aquela bastissa èra estada utilizada ancianament coma tribunal de justícia, residéncia de cònsols, preson e fin finala, ostalariá.
Los quatre costats de las cobèrtas recebon de noms, a l’oèst Sant Antoni, a l’èst “Servant”, al nòrd los Grands Cobèrts e al sud Miègjorn oriental e occidental. Mirapeis merita una visita pels aficionats al medievalisme.
