JEAN-MARIE, LE BERGER DE PEYREGUET, D’EDOUARD MONNEAU

Francesc Sangar.- A Édite-moi es estat publicat un libre en francés de l’escrivan e dessenhaire Édouard Monneau, “Jean Marie, le berger de Peyreguet”. A travèrs de las siuenas paginas, podèm descobrir lo mestièr de pastor que pòt desaparéisser.

Un an de rencontres, de conversacions entre l’autor e aquel pastor audenc a permés a Édouard Monneau de nos ofrir una vision fòrça complèta de la vida quotidiana de Jean-Marie qu’a trabalhat pendent mai de quaranta ans en mantenent un estil de vida tradicionala: aquel pastor abitava una cabana sens las innovacions de la vida modèrna (d’electricitat, d’electrodomestics) coma los pastors – e non solament eles – an viscut pendent de sègles. Una armonia amb la natura, la montanha, lo bòsc, tota una filosofia de vida, apareisson sens èsser nomenats, dins la causida de vida e lo mestièr de Jean-Marie.

Perque aquel libre es sustot una leiçon de vida. Los lectors descobrisson la vida personala e abituala d’aquel pastor. Lo libre es dividit en tres partidas, « Lo temps del rencontre », « Lo temps de la lucha » e « Anhelatge e Renaissença », perque la vida es tanben una mescla de rencontres, de luchas e de renaissenças, e Jean Marie nos demòstra amb la siuena pròpria experiencia aquela realitat. Dins los libres d’Édouard Monneau podèm totjorn trobar de la vida, e aquel darrièr libre es pas una excepcion.

Las descripcions de la vida de Jean Marie, dels paisatges audencs, del sieu mestièr de pastor… son acompanhadas dels meravilhoses dessenhs de l’autor, amb lo sieu estil particular e personal, coma se lo lector podiá dintrar en scèna e èsser un autre testimòni. Las conversacions entre l’autor e lo pastor incorpòran de referéncias tipicament audencas e ariegencas coma la lenga occitana o la mitica montanha de Montsegur.

Malurosament Jean-Marie nos a quitat, ara abita segurament un mond tan meravilhós coma aquel pastor desirava. Un autre, jove, a représ lo tropèl e contunha aquel ancian mestièr que nos remembra un mond que vòl pas desaparéisser encara.

Per aquerir aquel libre s’adreçar a edouard.monneau@gmail.com o prevot.martine@club-internet.fr