EMPÚRIAS E LA CONQUISTA BALEAR

CAM.- Malgrat que brica conegut, Ermenguer foguèt lo primièr comte d’Empúrias (813-817) aprés desseparar aquel comtat del de Girona. Çò de mai segur es que foguèsse un nòble gòt local e que foguèsse nomentat comte pel meteis emperaire Carlesmanhe o lo sieu filh Loís lo Pietós aperaquí l’an 813.

En 812, divèrses comtes septimans e gòts, dont lo comte d’Empúrias, viatgèren fins a Aquisgran, la capitala imperiala dels francs, per un judici sus cèrtas talhas qu’un grop de nòbles ispanics avián afirmat que los comtes devián pagar. E los comtes consideravan qu’aquò ja èra tròp. Per tot aquò, qualcunes istorians defensan que, en l’an 812 ja i podiá aver un comte d’Empúrias e qu’aqueste foguèsse Ermenguer.

I na pas gaire d’informacion biografica sus Ermenguer. Çò qu’es demorat es una de las màgers expedicions militaras catalanas contra de piratas musulmans de las illas Balears. Aquesta ataca se debanèt en l’an 813 e foguèt una vertadièra suspresa per totes, tanben pels atacans d’Empúrias, pr’amor que la resulta foguèt la conquista d’aquelas illas Balears en l’an 813.

Una granda batalha navala

Ermenguer, doncas dirigiguèt una flòta aquitana e catalana e sortiguèt d’Empúrias en l’an 813. La sieuna tòca èran las illas Balears. Ailà i avián centenars de piratas arabis qu’arrestavan la patz a la còsta catalana e emporitana. Segon de cronicas contemporanèas, quan la flòta del comte d’Empúrias Ermenguer ja èra prèp de la còsta balear arribèt una flòta d’arabis que tornavan de sacar Còrsega e Sardenha.

Val pas dire que i aguèt una vertadièra e granda batalha navala entre ambedoas flòtas, e que los crestians ganhèron la meteissa. La resulta d’aquela batalha doncas foguèt que los arabis perdèron aperaquí vint vaissèls e los crestians poguèron liurar de la preson mai de 500 crestians presonièrs. Los aquitans causiguèron de contunhar en Balears e creèron un protectorat d’aquelas illas, que seriá defensat e protegit pel comte d’Empúrias. Pasmens,  aquel protectorat demorèt pas gaire, pr’amor qu’en l’an 848, çò es mai de 35 ans puèi, èra ja tornarmai perdut a mans dels arabis.

Se parlam pas d’aquela expedicion e conquista de las illas Balears Ermenguèr auriá mòrt en l’an 817. La decision imperiala posteriora balhèt lo comtat d’Empúrias tornarmai al comtat catalan de Rosselhon, alara dirigit pel comte Gaucelm.

Val pas dire qu’aquela expedicion foguèt plan importanta e que uèi tanben contunha d’èsser plan desconeguda. Es pr’açò que cal demanar mai d’estudis sus aquela epòca e region pr’amor que las illas Balears foguèron crestianas ja pendent mai de 35 ans al sègle IXn, un prètzfach extraordinàri e que benlèu cal soslinhar mai quan parlam de l’edat medievala del luòc pr’amor que se debanèt gaireben 400 ans abans de la conquista definitiva d’aquelas illas pels catalans (1229). E açò tanben foguèt una bèla capitada d’Ermenguèr, lo primièr Comte d’Empúries, encara uèi fòrça dublidat.