XVI ena FÈSTA DELS TEMPLIÈRS DE PUIG-REIG
Francesc Sangar.- Pendent los jorns 27, 28 e 29 de junh s’es celebrada la setzena edicion de la Fèsta dels Templièrs de Puig-reig. En aquela vila de la comarca catalana del Berguedà existiguèt pendent l’Edat Mejana una de las comandarias templièras mai importantas de la Peninsula Iberica.
Organizada dempuèi l’Associacion Culturala Templièrs de Puig-reig son estadas celebradas setze fèstas amb la tòca de remembrar l’importància d’aquel òrdre militar e religiós pendent los sègles XIIn e XIIIn fins al sieu tragic fin l’an 1307. Un exercici de memòria istorica medievala, començat ongan amb la companhiá Infestum.
Tota sòrta d’activitats
Pendent los tres jorns, a l’entorn del castèl medieval, se son desvolopadas tota sòrta d’activitats per tota la familha, amb de jòcs pels mainats, de talhièrs d’escritura medievala, e de tints naturals, de recreacions medievalas de luchas de cavalièrs, d’espectacles de dança amb la companhiá Moravians e de musica fòlc amb lo grop Cul de sac e de fòlc-ròck cèlta amb Sal150, d’espectacles amb umor amb la Companhiá Cinot…
Una visita a la glèisa romanica de Sant Martin e al castèl, guidada per l’istorian Eudald Serra, mostrèt als assistents la vida quotidiana e l’estructura urbanistica e arquitectonica del Puig-reig medieval. E pendent la nuèch de dissabte la visita amb estructura teatrala del Castèl amb lo suggestiu nom de Mysterium.
La passacarrièra dels cavalièrs templièrs dempuèi lo castèl pendent la miejanuèch amb las tesas alugadas foguèt un dels moments culminants de las jornadas, e tanben fòrça emotiu lo nomentament dels nòus escudièrs e de cavalièrs de diumenge. En aquela edicion èra estada convidada l’Associacion Templièra de Gavà e tanben l’Associacion Sonus Venti de Montson.
