PODEROSA FALGUIÈRA

La tròba d’una esqueleta del sègle IX o X de la necropoli de Can Reiners, en Malhòrca e la sieuna analisi posteriora an permés confirmar l’utilizacion de la falguièra (tanben dicha heugièra o heuç) per la comunautat medievala d’aquela region europèa contra divèrsas malautiás. Maugrat que ja èra estada trobada en mai d’un tèxte medieval la sieuna utilizacion medicala, es lo primièr còp que s’es pogut demostrar scientificament.

Segon la còla scientifica qu’a fach aquela analisi e qu’a publicat un estudi al numeric de prestigi internacional Journal of Ostearcheology (Ferns as healing plants in medieval Mallorca), la falguièra seriá estada emplegada, çò de mai segur, per luchar contra de pèiras renalas, de congestions e encara d’alopecia.

La coccion de falguièra foguèt utilizada per lo suenhar de malautiás de la pèl, urinàrias o de congestion.

L’esqueleta que confirmèt la preséncia de rèstas de falguièra en l’organisme èra lo d’un òme amb una edat d’entre 21 e 30 annadas e sepelit en aquela necropòli malhorquina. Los òsses avián una cèrta preséncia de plantas de grana, coma lo blat o encara d’autras, e atanben d’espòras qu’an una origina vegetala en la planta de la falguièra.

Fins uèi lo jorn dengun poguèt confirmar que la falguièra èra part de la dièta umana e pr’aquò se pensa pus en una utilizacion medicala. D’efièch divèrses tèxtes del sègle I suggerison que la fuèlha de falguièra èra ja emplegada coma coccion per luchar contra cèrtas malautiás.

Una planta emplegada en tota Euròpa

Los libres medicinals europèus de l’epòca medievala conservats fins uèi parlan del sieu emplèg en fòrça païses europèus. Totun, los arqueològs avián pas pogut identificar la planta de la falguièra encara en cap rèsta umana de l’epòca.

Elena Fiorin, de l’Universitat de York, e qu’a publicat l’estudi amassa amb Llorenç Sáez e Assumpció Malgosa, soslinhèt que la trobalha permetiá afirmar que las cellulas trapadas en l’esqueleta èran, totalament, de falguièra (Asplenium trichomanes), una espècia de planta que pòt encara èsser trobada en d’airals rocalhoses.

“Son de falguièras emplegadas per d’especialistas en d’èrbas, d’infermiers, medecins e d’autres pendent fòrça sègles en tot Euròpa, çò diguèt Fiorin. Totun, fins ara solament i avián de pròvas documentalas de la sieuna utilizacion. L’analisi de las dents de l’esqueleta demòstra qu’en aquela region d’Al Andalus èran plan conegudas las proprietats medicinalas de qualqu’unas plantas e cossí las emplegar”.

Divèrses tèxtes del sègle I suggerison que la fuèlha de falguièra èra ja emplegada coma coccion per luchar contra cèrtas malautiás.

Los tèxtes medievals de l’epòca qu’an demorat fins a uèi lo jorn mòstran qu’èra facha una infusion liquida amb d’aiga e de falguièras frescas o de fuèlhas secas. De còps la coccion aviá tanplan de flors d’iranja, o de sucre o de mèl per li balhar mai sabor.

Maugrat aquò, los tèxtes medievals tanben soslinhan que las plantas coma la falguièra solament podián èsser emplegadas per luchar contra cèrtas malautiás coma la congestion, de pèiras renalas o l’alopecia. Pas d’autras. A mai, tanben podiá estimular la menstrualitat femenina.

Maugrat que la còla qu’analizèt aquela esqueleta pòt pas afirmar quala malautiá aviá aquel òme, se pòt arribar a la conclusion que la coccion de falguièra foguèt utilizada per lo suenhar de malautiás de la pèl, urinàrias o de congestion.

“La recèrca confirma l’emplèg de la falguièra al Mediterranèu pendent l’epòca medievala, çò apondèt Fiorin. Ara sabèm que l’analisi dentala pòt balhar plan mai d’informacion sus l’utilizacion de plantas o encara pus. Las fuèlhas de falguièra son encara emplegadas uèi en Euròpa tota per luchar contra una grana varietat de malautiás. L’arqueologia demòstra que los umans utilizèron l’environament pendent de sègles per la melhora de la santat a travèrs de tota la nòstra evolucion”.

Redaccion

Us de les cookies

aqueste sit web utiliza de cookies, tan pròpris coma de tèrças personas, per amassar d’informacions estatisticas de la vòstra navigacion e per vos ofrir un servici personalizat. Se contunhatz de navigar, consideram que n'acceptatz l'usatge. Mai d’informacion..


ACEPTAR
Aviso de cookies