LO DARRIÈR EMPERAIRE

Cam.- Es pro conegut que l’Edat Mejana comencèt apuèi la casuda de l’Empèri Roman d’Occident (e pas lo d’Orient, que demorariá encara 1000 ans pus) en l’an 476. Totes sèm d’acòrdi quora cal nomentar lo darrièr emperaire, Romul August – qu’aguèt lo quite nom que lo fondator de Roma en l’an 776 abans lo Crist-. E benlèu atanben totes podem arribar dire, doncas, que l’Edat Mejana (metaforicament, de segur, pr’amor que lo cambiament arribèt dins un procès long dins lo temps e que demorariá de sègles fins la naissença de la societat feudala) comencèt en 476.

Totun, l’istòria, de còps, es pas totalament cèrta. D’efièch, i aguèt un emperaire oficial reconegut per Bizanci fins l’an 480, Juli Nepot. Alavetz, cal se demandar se l’Edat Mejana comencèt oficialament en 476 o en 480.

Juli Nepot foguèt un emperaire posterior e anterior atanben a Romul August – mal nomentat pel pòble roman coma Momil (Pichona Desfortuna) o encara Augustolus (çò que en latin volriá dire lo Pichon August, pr’amor qu’aviá pas cap caracteristica del fondator de l’Empèri Roman en 27 aprés lo Crist, August. E o foguèt del temps qu’Odoacre, cap dels eruls (e pas dels ostrogòts coma sovent se pensa) foguèt reconegut coma rei d’Itàlia. Aital, o decidiguèt Zenon, emperaire de l’Empèri Roman d’Orient. E dempuèi alavetz, la discussion a devessit los istorians (d’unes confirman que lo darrièr emperaire foguèt Romul August del temps que d’autres afirman encara que foguèt Juli Nepot).

Odoacre foguèt un dels caps d’una amassada de tribús barbaras qu’ataquèron Roma en 476 pr’amor que lo paire de Romul August (mièg roman e mièg barbar), Orestes, aviá desbrembat devessir la tèrra per la donar als barbars, un fach que ja èra estat confirmat per lei pel paire de Romul August e qu’èra segur que seriá doncas fach). Solament aital poguèt lo paire de Romul August conquistar Roma e provocar la fugida imperiala de Juli Nepot.

L’arribada d’Orestes a Roma

Maugrat aquò, Orestes considerèt que se proclamar emperaire après dintrar en Roma seriá, per la sieuna origina, pus un problèma que non una solucion. E nomentèt lo sieu filh, Romul August, coma lo darrièr (o benlèu pas) emperaire de l’Empèri Roman d’Occident.

La vertat es que, pauc temps aprés la siá coronacion, lo cap dels eruls ataquèt Roma e envièt lo jove Romul August a l’illa de l’Uoù (prèpa de Nàpols). Apuèi demandèt Zenon lo reconéisser coma rex d’Itàlia del temps qu’acceptava la tornada de Juli Nepot coma emperaire.

Divèrses istorians afirman doncas que l’edat Mejana comencèt en 480 apuèi Juli Nepot. D’autres, encara, que pendent l’an 476 pr’amor que lo darrièr emperaire foguèt Romul August (soslinhan que, d’efièch, Juli Nepot, aguèt pas cap d’autoritat reala pr’amor que lo vertadièr sobeiran èra Odoacre).

Per ansin comencèt l’Edat mejana, que demorariá pus de 1000 annadas e qu’auriá en aquel episòdi imperial un començament pro dubèrt. E aquò es pas brica important pr’amor que l’istòria es estada totjorn relativa e las datas son çò de mens important.