Mond

L’EDAT DE NARA

Redaccion.- Pendent lo començament de l’edat medievala Japon visquèt una epòca de cambiament socials, politics e administratius que demorarián fins practicament la fin del sègle XIXen. Foguèt l’epòca japonesa coneguda coma Edat de Nara pr’amor de la nòva capitala estatala que l’emperaire Yamato bastiguèt apuèi unificar lo país aprés de sègles de lucha feudala e de desseparacion politica.

Los nòus foncionaris nipons se n’anèron fins a totas las províncias de Japon.

L’Edat de Nara comencèt aperaquí lo sègle VIen, quand comencèt una nòva epòca de cambiaments socials qu’avián coma causa dirècta la creacion d’una nòva còrt imperiala a Nara. Los nòus sobeirans japoneses volguèron adaptar la cultura chinesa que s’espandissiá pertot Asia e, per ansin, bastiguèron un nòu poder mai o mens centralizat, amb un nòu biais d’escriure (lo chinés) e una nòva religion tanben d’origina chinesa – lo bodisme-. Aquò donèt Japon l’escasença de crear una nòva e plan eficaça administracion (restacada amb l’epòca anteriora).

Un nòu còdi administratiu

L’an 701 foguèt decretat lo nòu còdi Taiho, que demorariá fins l’an 1870. Alavetz l’emperaire Meiji l’aboliguèt e amb el tot un sistèma d’organizacion sociala feudala que podiá pas pus èsser compatible amb lo mond modèrn.

Aquel còdi foguèt devessit en doas partidas; una administrativa, desvolopada dins la còrt e sus la populacion, e una autra encara que soslinhava cossí devián èsser punits los crims e delictes que se debanèsson en Japon.

Foguèron los foncionaris que desvolopèron lo còdi Taiho que se n’anèron a totas las 68 nòvas províncias niponas per assajar d’influïr la populacion amb la nòva morala e manièra de pensar de la nòva còrt de Nara. Lo cors dels foncionaris demorèt en cinc nauts grads (de foncionaris qu’apertenián a l’aristocracia japonesa) e quatre autres grads per de foncionaris de pus bais nivèl e normalament d’umbla origina.

La nòva Edat de Nara cambiariá per totjorn la societat japonesa.

Lo nòu foncionari japonés de l’Edat de Nara sabiá escriure e legir totjorn en lenga chinesa (aquò èra obligatòri pr’amor qu’aquela foguèt declarada lenga oficiala de l’administracion japonesa). Totun, que i aviá de foncionaris que sabián cossí escriure de poesias en chinés e d’autres que sonque podián memorizar cèrtas formulas dins un chinés pro simple.

Los paisans (devessits en d’ostals de fins a 100 personas) foguèron maugrat aquò lo vertadièr supòrt de la còrt de Nara. Caliá pagar d’impòstes amb de ris a mai de trabalhar totjorn quora lo nòble local o lo foncionari territorial o demandava. Lo sistèma feudal de Nara, inspirat en lo sistèma feudal chinés, demorariá mai de tres sègles de manièra reala e teoricament pus de 1000 ans mai. Apuèi Yamato e Nara, aquel país pichon medieval d’Asia demorariá cambiat per totjorn.