CONFERÉNCIA A LHÈIDA SUS DE CATARS E DE TROBADORS
Francesc Sangar.- Diluns 29 de Novembre foguèt impartida una interessanta conferéncia amb lo títol de “Catars e Trobadors” amb los professors Isabel Grifoll e Joan J. Busqueta de l’Universitat de Lhèida, dins del cicle ÒC CULTURA, coordinat per Mariona Miret i organizat per la Seccion Occitan Aranés de l’Institut d’Estudis Ilerdencs e amb la collaboracion del Conselh Generau de l’Aran e la Chambra d’Òc.
Joan J. Busqueta, Professor d’Istòria Medievala, expliquèt que la vila de Lhèida foguèt receptritz de fòrça familhas occitanas, coma podèm observar en fòrça noms de familha dels sieus abitants (Tarascon, Tolosa…), per la bona situacion geografica de la vila, qu’autrejava de grandas possibilitats economicas e comercialas.
Lo professor expliquèt qualques faches istorics ligats a la preséncia d’”eretges” coma la promulgacion l’an 1194 jol regnat d’Alfons lo Cast a Lhèida d’un dels primièrs edictes a la Corona d’Aragon qu’obligava a perseguir l’”eretgia”, la preséncia a Besièrs d’un possible catar nomenat Bernat de Lhèida o l’acte public de perdon pels possibles pecats “eretics” a la vila l’an 1257.
Un fenomèn literari unic
Isabel Grifoll, professora de Literatura Catalana, expliquèt las caracteristicas que definiguèron l’insolit fenomèn literari de la poesia trobadoresca, una poesia culta en “lenga vulgara”, que convertissiá l’occitana en la primièra lenga romanica culta, en contrastant amb la poesia latina (tota religiosa) qu’èra compausada als monastèris.
Foguèt un procès de socializacion cultural, amb valors coma la convivéncia, la cortesia, l’educacion… Una cultura laïca per de laïcs, que dignificava la femna, que daissava d’èsser considerada injustament coma un “objècte” o coma “pèça d’escambi” entre familhas.
Dins del meteis cicle ÒC CULTURA foguèron realizadas d’autras activitats, coma una passejada per la vila medievala de Lhèida, un espectacle- omenatge a las “trobairitz” e l’exibicion del film “Bogre, la granda eresia europèa” del director Fredo Valla consacrat al Catarisme. Una sèria d’activitats que demòstran lo grand interès que desvelha la cultura occitana a Lhèida. ÒC CULTURA organizarà d’activitats culturalas de tematica occitana amb una periodicitat annala. Mercejam a Mariona Miret i a l’Institut d’Estudis Ilerdencs la cession de las fotografias. Per mai d’informacion sus aquela conferéncia; http://lleidatv.alacarta.cat/especials-lleida/capitol/oc-cultura—taula-rodona-catars-i-trobadors.
