PRESENTACION DEL LIBRE “50 ENDRECHES DEL CATARISME OCCITANOCATALAN” DE SERGI GRAU
Francesc Sangar.- Presentacion amb succès del nòu libre de l’istorian Sergi Grau Torras a la librariá “La Central del Raval” de Barcelona lo passat dimars 7 de novembre. En aquel nòu trabalh, publicat per l’editorial Cossetània, “50 endreches del Catarisme occitanocatalan” nos prepausa cinquanta comunas catalanas, valencianas e occitanas ont los Bons Òmes e las Bonas Femnas visquèron e cambièron lor istòria.
Cossí remembrava l’autor pendent la presentacion, un dels principals problèmas es l’inexisténcia de bastissas ligadas dirèctament al Catarisme, pr’amor que los cresents avián pas de glèisas nimai daissavan de monuments “de pèira”. Lo fotògraf del libre, Chopo García-Día apondèt la dificultat per mostrar aqueles endreches amb la maximala fidelitat possibla a lors imatges a l’epòca dels Catars, sègles XII e XIII.
Los endreches, per totas las tèrras catalanas, valencianas e occitanas, mòstran tanben las resultas de las darrièras recercas, que defendon la granda importància de las comunautats cataras de las comarcas catalanas de la Plana de Lhèida. Los endreches occitans del libre escuelhuts son aqueles qu’an aguda tanben una granda preséncia de Catars e una granda relacion amb Catalonha.
La presentacion foguèt acompanhada per la lectura de tèxtes istorics ligats al Catarisme amb l’actritz Sílvia Bel. Un libre basic e de besonh pels interessats en aquel capítol de la nòstra istòria.
