POESIA DE HEMNAS EN TÈRRA D’ÒC
Las cercairas Katy Bernard, de l’Universitat de Bordèu Montanha, e Marie-Anne Châteaureynaud, de l’Universitat de Bordèu) qu’organizan divés 8 de deceme a l’Universitat Bordèu Montanha ua jornada d’estudi titolada “Poesia de hemnas en tèrra d’òc (prumèra part, l’Atge Mejan)”, en partenariat dab l’associacion estudianta Bord’Òc.
La matiada serà consacrada a 3 conferéncias pertocant las trobairitz mès tanben Alienòr d’Aquitània. Puish, lo public serà convidat a participar en 2 talhèrs collectius, on seràn presentadas divèrsas ressorças pedagogicas a l’entorn deus tèmas desvolopats pendent lo matin. Tanben se vòl soscar amassa biaishs de mobilizar aqueras hemnas occitanas d’excepcion en classa (ja siá d’occitan o d’autas matièras). La jornada, fin finau, s’acabarà dab lo concèrt “Marilis Orionaa en trio” a l’auditòri de la MDE a 16h30.
Ua jornada adreçada aus estudiants
La jornada s’adreça en prioritat aus estudiants mès tanben futurs ensenhaires, e pr’amor d’aquò es obèrta a tots e totaument a gratís. La jornada se debanarà en francés mes serà possible de parlar occitan pontuaument e se poirà parlar de tèxtes medievaus occitans, de l’utilizacion de la lenga occitana en classe, e tanben de las ressorças pedagogicas disponiblas en occitan.
D’un aute costat, tanben serà possible de seguir la jornada en linha maugrat que des de Bord’Òc se recomanda la modalitat presenciau. Atau, entà recéber lo ligam Zoom, que cau mandar un corric a: asso.bordoc@gmail.com .
La Redaccion
